ކުރީގެ ރައީސް އަދި ކުރިއަށް އޮތް ރިޔާސީ އިންތިޚާބުގައި ޕީޕީއެންގެ ރިޔާސީ ކެންޑިޑޭޓް ރައީސް އަބްދުﷲ ޔާމީން އަބްދުލްގައްޔޫމު މިނިވަންކުރުމަށް ގޮވާލާ ހުކުރު ދުވަހު އިދިކޮޅުން މުޅި ރާއްޖޭގައި ސުލްހަވެރި ހިނގާލުމެއް ބާއްވަން ނިންމައިފިއެވެ.
އިދިކޮޅުން ބުނީ މި އިހުތިޖާޖު ދިވެހިރާއްޖޭގެ މީހުން ދިރިއުޅޭ ކޮންމެ ރަށެއްގައިވެސް ކުރިއަށް ގެންދާނެކަމަށެވެ.
އިދިކޮޅުގެ މި ހިނގާލުމަށް ދީފައިވާ ނަމަކީ "ސަބަބުވެރި ހިނގާލުން" އެވެ.
މިފަދައިން މި ނަން ދީފައިވަނީ ރައީސް ޔާމީންގެ މައްޗަށް ނުހައްގުން ހުކުމެއް ކޮށްފައިވަނީ ހެކިތަކަށް ބެލުމެއްނެތި ސަބަބުވެރި އިންސާނެއްގެ ވިސްނުން ބަހަނާއެެއްގެ ގޮތުގައި ބޭނުންކޮށްގެން ކަމަށް ވާތީކަމަށް އިދިކޮޅުން ވަނީ ބުނެފައެވެ.
އަތޮޅުތެރޭގެ އިތުރުން މާލޭގައި މި އިހުތިޖާޖު ބާއްވަން ނިންމާފައިވާއިރު، އިދިކޮޅުގެ އިހުތިޖާޖު ކުރިއަށް ގެންދިއުމަށް ފުލުހުން ވަނީ ހުއްދަ ދީފައެވެ. އަދި މި އިހުތިޖާޖުގައި ކުރިއަށް ގެންދާނީ ފުލުހުންގެ އިރުޝާދާއި އެންގެވުންތަކާއި އެއްގޮތަށްކަމަށް އިދިކޮޅުން ވަނީ ބުނެފައެވެ.
ރައީސް ޔާމީން މިނިވަންކޮށް އެމަނިކުފާނު އަނބުރާ ވެރިކަމަށް ގެނައުމަށް އިދިކޮޅުގެ ޖޮއިންޓް ސެނެޓުން ވަނީ ފާސްކޮށްފައެވެ. އަދި އެމަނިކުފާނަށް އިންދާފު ހޯދުމަށް ކުރަން ހުރި ހުރިހާ މަސައްކަތެއް ޕާޓީގެ އެކި ގުނަވަންތަކުން ކުރިއަށް ގެންދާނެކަމުގެ ޔަގީންކަންވެސް އިދިކޮޅުން ވަނީ ދީފައެވެ.
Advertisement
This content is created and paid for by advertisers and does not involve Voice Journalists
