ހަސަދަވެރި ދީނީ އިލްމުވެރިންގެ އަމަލުތައް ލާދީނީ ކަންކަން ފެތުރުމަށް މަސައްކަތް ކުރާ މީހުންނަށް ދޫނުކުރާކަމަށް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައިވަނީ މި ރާއްޖޭގައިވެސް ހަސަދަވެރިކަމުގެ ސިފަ އަށަގެންފައިވާ ދީނީ އިލްމުވެރިންތަކެއް ތިއްބެވިކަމާއި އެމީހުންގެ ފުށުން މުޖުތަމައުގައި ފެތުރެމުންދާ ނުބައި ކަންކަމަށް އަލިއަޅުވާލާ ފޭސްބުކުގައި ހިއްސާކުރެއްވި ޚިޔާލުފުޅެއްގައެވެ.
ޑރ ޖަމީލުގެ އެ ޕޯސްޓުގައި ވަނީ ހަސަދަވެރި ދީނީ އިލްމުވެރިންގެ ސަބަބުން އަދުގެ ޖީލަށް ކުރާނެ ނޭދެވޭ އަސަރުތަކާއި ގައުމަށް ލިބޭނެ ގެއްލުންތަކަށް އަލިއަޅުވާލައްވާފައެވެ.
އެގޮތުން ޑރ ޖަމީލު ވިދާޅުވެފައިވަނީ ހަސަދަވެރިކަމުގެ ވަބާއަކީ ދީނީ އިލްމުވެރިންގެ ތެރޭގައިވެސް އޮތް ކަމެއްކަމަށެވެ. އެއީ ހެޔޮ އަމަލުތައް ފޮހެލާ ބައްޔެއް ކަމަށާއި، މި މުޖުތަމައުގައިވެސް ހަސަދަވެރިކަމުގެ ބަލިމަޑުކަން ޖެހިފައިވާ ދީނީ އިލްމުވެރިން ތިއްބެވިކަމަށެވެ.
އެއާއެކު އެމަނިކުފާނު ވިދާޅުވީ، އެފަދަ ދީނީ އިލްމުވެރިންގެ ސަބަބު ދީނީ އިލްމުވެރިންނަށް އަދުގެ ޒުވާން ޖީލު ކުރާ އިތުބާރު ގެއްލިގެންދާކަމަށެވެ. އަދި ރާއްޖޭގެ ޒުވާން ޖީލަށް އިސްލާމްދީނުގެ ފުރިހަމަކާއި ރީތިކަން އޮޅެނީ އެފަދަ ދީނީ އިލްމުވެރިންގެ ސަބަބުންކަމަށެވެ.
އެފަދަ ދީނީ އިލްމުވެރިންނާއި، އިސްލާމްދީނަށް ފުރައްސާރަކޮށް ލާދީނީ ރިޕޯޓު ނެރުނު އެމްޑީއެންގެ ފިކުރު ތަފުރާ މީހުންނާއި ތަފާތެއް ނެތްކަމަށް ޑރ ޖަމީލު ވިދާޅުވިއެވެ.
އެފަދަ ދީނީ އިލްމުވެރިންގެ ދުލާއި ގަލަމުން ރައްކާތެރިކަން ނުލިބޭ އެތައް ރައްޔިތުންތަކެއް ތިބިކަންވެސް ޑރ ޖަމީލު ފާހަގަކުރެއްވިއެވެ.
ވަކި ބޭފުޅެއްގެ ނަމެއް ޑރ ޖަމީލުގެ އެ މާނަފުން ޕޯސްޓުގައި ވިދާޅުވެފައި ނުވި ނަމަވެސް، މިފަހުން ރާއްޖޭގެ ތާރީހުގައި ހިނގާފައިވާ ކަންކަމަށް ބަލާއިރު، ދީނީ ވަހުދަތު ހިމާޔަތްކުރުމުގެ ނަމުގައި އުފައްދާފައިވާ އަދާލަތު ޕާޓީގެ ދީނީ އިލްމުވެރިން ގެންދަނީ ސިޔާސީ ގޮތުން އެމީހުން ގަބޫލު ނުކުރާ ލީޑަރުންގެ އިސްތަށިފުޅުގައި ސާބިތު ނުހިފޭ ބޮޑެތި ބަދުނާމުތައް އަޅުވާ އެފަދަ ލީޑަރުންނާއި މެދު ރައްޔިތުންގެ ހިތުގައި ނަފްރަތު އުފައްދަން މަސައްކަތް ކުރަމުންނެވެ.
އެހެން ކަމުން ޑރ ޖަމީލުގެ އެ ޕޯސްޓުގައި ހަސަދަވެރި ދީނީ އިލްމުވެރިންކަމަށް ވިދާޅުވެފައި އެވަނީ އަދާލަތު ޕާޓީގެ ދީނީ އިލްމުވެރިން އުޅުއްވާގޮތަށް އަމަލުކުރައްވާ ދީނީ އިލްމުވެރިންނަށްކަމަށް ބެލެވެއެވެ.
Advertisement
This content is created and paid for by advertisers and does not involve Voice Journalists
