މާލެ ސިޓީ އާއި ވިލިމާލޭގެ ގޭގެއިން ކުނި ނެގުމުގެ ޒިންމާ ހަވާލު ވެފައިވާ ވެމްކޯ އިން، އެމަސައްކަތައް ލާރިދޭ ގޭގެއިން ވެސް ކުނި ނުނަގާ މައްސަލަ ބޮޑުވެއްޖެއެވެ. 

ގޭބީސީތަކުން ކޮތަޅުތަކަށް އަޅައިގެން ނެރޭ ކުނި ވެމްކޯއިން ނުނަގާ މައްސަލަ ފެންމަތި ވުނާއި ގުޅިގެން އާއްމުންގެ ޝަކުވާ އާއި ސިޓީ ކައުންސިލްގެ ނުރުހުން އަމާޒުވުމާއި ގުޅިގެން ވެމްކޯއިން އިއްޔެ ބޭއްވި ނޫސްވެރިންގެ ބައްދަލުވުމުގައި ބުނީ، އެ ކުންފުނިން ކުނި ނުނަގަނީ ކުނި ނެގުމަށް ރެޖިސްޓާ ނުކުރާ ގޭގެއިން ކަމަށެވެ. 

އަދި މީގެ ކުރިން މަގު މަތީގައި ގޭގެއިން ބަހައްޓާފައި ހުންނަ ކުނި ވެމްކޯއިން ނަގަމުންދިޔައީ މަގު މަތި ސާފު ކުރުމަށް ސިޓީ ކައުންސިލުން ވެމްކޯއާއި ހަވާލު ކޮށްފައިވާތީ ކަމަށް ވެސް އެ ކުންފުނިން ބުނެފައި ވެއެވެ. 

އެހެން ނަމަވެސް، ކުނި ނެގުމަށް ވެމްކޯ ގައި ރެޖިސްޓާ ކޮށް، އެކަމަށް ދައްކަން ޖެހޭ ފީ ދައްކާ މީހުންގެ ކުނިވެސް ނުނަގާ ކަމަށް އެ ފަރާތްތަކުން އަންނަނީ ބުނަމުންނެވެ. 

އެގޮތުން، އެފަދަ ފަރާތެއް މީސްމީޑިއާގައި އާއްމު ކޮށްފައިވާ ޓުވީޓެއް ހިއްސާ ކުރައްވަމުން މާލެ ސިޓީ ގެ މޭޔަރ ޑރ. މުހައްމަދު މުއިއްޒު ވެސް ވަނީ އެކަމާއި ކަންބޮޑުވުން ފާޅުކޮށްފަ އެވެ. 

އަދި ކުނި ނެގުމަށް ރެޖިސްޓާ ކޮށް ލާރި ދައްކާ އެތައް ފަރާތެއްގެ ކުނި ނުނަގާ ކަމަށް އެ ފަރާތްތަކުން މޭޔަރ ގެ އަރިހުގައި ވެސް ދަންނަވާފައިވާ ކަމަށް ވިދާޅުވެފައި ވެއެވެ. 

"ވެމްކޯގެ ވެރިންނާއި، އެންވަޔަރަމެންޓް މިނިސްޓްރީން ކިތަންމެ ދޮގު ހެދިޔަސް ހަގީގަތް ވަރަށް ސާފު" ޑރ. މުއިއްޒު ވިދާޅުވިއެވެ