މީހުންގެ އަތުން ދަރަންޏަށް ފައިސާ ހޯދައިގެން އަދި ބޭންކުން ލޯނު ނަގައިގެން ވެސް ބައެއް މީހުން ބޮޑަތި، ބޭކާރު ޚަރަދުތައް ކުރާ ކަމަށް، އެއީ ވަރަށް ހިތާމަކުރިކަމެއްކަމަށް މިއަދުގެ ހުކުރުޚުތުބާގައި ބުނެފިއެވެ.

އިޤްތިޞާދު ކުރުމުގެ މައްޗަށް އަލިއަޅުވާލައި މިއަދު ދީފައިވާ ޚުތުބާގައި ބުުނީ، މުދަލާއި ފައިސާއަކީ މާތް ރަސްކަލާނގެ އިންސާނާއަށް ދެއްވި ނިޢުމަތްތަކުގެ ތެރެއިން ވަރަށް މަތިވެރި ދެ ނިއުމަތެއް ކަމަށެވެ. އަދި އެކަލާންގެ އަންގަވާފައިވާ ގޮތަށް މުދަލާއި ފައިސާ ހޯދުމާއި އެކަލާންގެ އަންގަވާފައިވާ ގޮތައް އެތަކެތި ހޭދަކުރުމަކީ ސަވާބާއި ދަރުމަ ހުރި ކަމެއް ކަމަށް ބުނެފައިވެއެވެ.

"ތިމާގެ އަތުގައި ހުރި އެއްޗެއް ހޭދަކުރަންވީގޮތް ބަޔާންކުރައްވާ މާތް ރަސްކަލާނގެ ވަހީ ކުރައްވާފައި ބަސްފުޅެއްގެ މާނައިގައިވެއެވެ. “އަދި އެ އުރެންނީ (އެބަހީ: މުއުމިނުންނީ) އެއުރެން ހޭދައެއް ކޮށްފިނަމަ އިސްރާފު ނުކުރާ، އަދި މުށްބާރުވެސް ނުކުރާ، އަދި އެދެމެދުގައި މެދުމިންވެތިބޭ މީހުންނެވެ.” ޚުތުބާ ގައި ބުނެފައި ވެއެވެ. 

ކަންމިހެން އޮތް ނަމަވެސް އަހުރެމެންގެ ތެރެއިން ބައެއް މީހުން ކަންކުރަމުން ދަނީ މިއާ ޚިލާފަށް ކަމަށް ޚުތުބާގައި ބުނެފައިވެއެވެ. އެގޮތުން، ތިމާގެ އާމްދަނީއަށް ބެލުމެއް ނެތި ޚަރަދުތައް ކުރުމާއި، ޒަމާނީ ތަރައްޤީ އާއި ޓެކްނޮލޮޖީގެ މި ޒަމާނުގައި ބާޒާރަށް އަލަށް އަންނަހާ އެއްޗެއް ބައެއް މީހުން ހޯދާ ކަމަށް ޚުތުބާގައި ބުނެފައިވެއެވެ.

މީގެ އިތުރުން، ދަރިންގެ ކުޅޭ އެއްޗެހި ވެސް ހަލާކުވުމުގެ ކުރިން ގަނެދޭ ކަމަށާ، ތިމާގެ ކިބައިގައި ފުދުންތެރިކަމާއި، ތަނަވަސްކަން ނެތަސް، މީހުންގެ އަތުން ދަރަންޏަށް ފައިސާ ހޯދައިގެން ބޭންކުން ލޯނު ނަގައިގެން ނުވަތަ ސަލާމްޖަހައިގެން ވެސް ބައެއް މީހުން ބޮޑަތި، ބޭކާރު ޚަރަދުތައް ކުރާ ކަން ފާހަގަކޮށް ޚުތުބާގައި ވަނީ އެއީ ވަރަށް ހިތާމަކުރިކަމެއް ކަމަށް ބުނެފައެވެ.

"ސަލާމްޖަހައިގެން އެއްޗެއް ހޯދުމުގެ ނުބައިކަން ބަޔާން ކުރައްވައި ހަދީޘް ކުރައްވާފައެވެ. ” އެމީހަކަށް ފަޤީރުކަމެއް މެދުވެރިވާ ހިނދު، އެހެން މީހުންގެ މައްޗަށް އެކަން ރައްދުކޮށް (އެބަހީ: މީހުންގެ ގާތުން ސަލާމް ޖަހައި ތަކެއްޗަށް އެދޭނަމަ) އެމީހެއްގެ ފަޤީރުކަން ނުފިއްލަވާ ހުއްޓެވެ. އަދި މާތްﷲ ގެ ޙަޟްރަތުން ފަޤީރުކަން ފިއްލެވުމަށް އެދެފި މީހާއަށް އަވަސް ގޮތަކަށް ނުވަތަ ލަހުން ވިޔަށް މާތްﷲ އެމީހާއަށް އަވަސް ގޮތަކަށް ނުވަތަ ލަހުން ވިޔަސް މާތްﷲ އެމީހާއަށް ރިޒުގު ތަނަވަސްކޮށް ދެއްވާ ހުއްޓެވެ." ޚުތުބާގައި ބުނެފައިވެއެވެ.