އާއަހަރަށް މިރޭ މަރުހަބާ ކިޔާއިރު ފާގަނަކުރެވޭ ދެކަމެއް ރާއްޖޭގައި ކުރެވިގެން، ބަދަލުވެގެންދާނެއެވެ.

އެގޮތުން މިރޭ 12 ޖެހުމާއެކު މާލެ ސަރަހައްދުން ހުޅުމާލެ، އަދި ރާއްޖޭގެ އެކި ސަރަހައްދުތަކުގެ ރިސޯޓުތަކުގައި ހަވާއަރުވަންވަނީ ހަމަޖެހިފައެވެ. 

މިނިސްޓްރީ އޮފް ޔޫތް ސްޕޯޓްސް އެންޑް ކޮޮމިއުނިޓީ އެމްޕަވާމެންޓުން ވަނީ އާ އަހަރު ފެށުން ފާހަގަކުރުމަށް ހުޅުމާލޭގައި ޝޯއެއް ބޭއްވުމަށް ނިންމާފައިވާކަން ހާމަކޮށްފަ އެވެ. އެ ޝޯ އޮންނާނީ މިރޭ 8:30 އިން ފެށިގެން ހުޅުމާލޭ ސިންތެޓިކް ޓްރެކުގަ އެވެ.

މި ޝޯގައި ހަވާ އެރުވުމާއި މިއުޒިކުގެ އެކި ހަރަކާތްތައް ފެނިގެން ދާނެ އެވެ. 

މިއާއެކު ރައްޔިތުންގެ މަޖިލިހުން ފާސްކޮށް ރައީސް އިބްރާހިމް މުހައްމަދު ސޯލިހު ތަސްދީގުކުރެއްވި މުދަލާއި ހިދުމަތުން ޓެކްސް ނެގުމުގެ ގާނޫނަށް ގެނައި އިސްލާހާ އެކު، މިރޭ 12 އިން ފެށިގެން ރާއްޖޭގައި ޖީއެސްޓީ އާއި ޓީޖީއެސްޓީ ބޮޑުވާނެ އެވެ.

މިރެއިން ފެށިގެން، އާންމު ހިދުމަތްތަކުން (ޖީއެސްޓީ) - %8، ފަތުުރުވެރިކަމުގެ ހިދުމަތް ދޭ ތަންތަނުން (ޓީޖީއެސްޓީ) - %16 އަށް ބޮޑުވެގެންދާނެއެވެ.

ޓެކްސް ރޭޓު ބޮޑުކުރުމާ ގުޅިގެން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އާއި ޓްރެވަލް އެޖެންޓުންގެ ޖަމިއްޔާ މަޓާޓޯ އިން ވަނީ ކަންބޮޑުވުން ފާޅުކުރި ނަމަވެސް، ދުނިޔޭގެ މާލީ ބޮޑެތި އިދާރާތައް ކަމަށް ވާ އައިއެމްއެފް އާއި ވޯލްޑް ބޭންކުން ވަނީ ރާއްޖޭގެ ޓެކްސް ބޮޑުކުރަން ތާއީދުކޮށްފަ އެވެ. މިއާއެކު ރާއްޖޭގެ ދަރަންޏާއި ސަރުކާރު ހިންގުމަށް ދާ ހަރަދުގެ ބޮޑުކަމާއި ގުޅިގެން އެ ޖަމިއްޔާތަކުން ވަނީ ކަންބޮޑުވުން ފާޅުކޮށް މިކަންކަން އިސްލާހުކުރަންޖެހޭކަން ފާހަގަކޮށްފައެވެ.