މިއަދުން ފެށިގެން ޖީއެސްޓީ/ޓީޖީއެސްޓީ ބޮޑުކުރެވިފައިވާއިރު، މި ފެށުނު އައު އަހަރަކީ ދަތިތަކާއި ކުރިމަތިލާން ޖެހޭ އަހަރަކަށް ވެގެންދާނެ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

އާ އަހަރުގެ ތަހުނިޔާ އަރިސްކުރައްވާ، ރައީސް ނަޝީދު ކުރެއްވި ޓްވީޓެއްގައި ވަނީ، މި ފެށުނު 2023 ވަނަ އަހަރުގެ ތެރޭގައި ޓެކްސް ބޮޑު ކުރުމުގެ ސަބަބުން، އިންފްލޭޝަން ރޭޓު މައްޗަށް ގޮސް ތަކެތީގެ އަގުތައް އުފުލިގެންދާނެ ކަން ފާހަގަކުރައްވާފައެވެ.

އަދި އޭގެ ސަބަބުން ގިނަ ގޮންޖެހުންތަކަކާއި ދަތިތަކާއިވެސް ކުރިމަތިލާންޖެހޭނެ ކަމަށްވެސް ވިދާޅުވިއެވެ.

Advertisement

ޓެކްސް ބޮޑު ކުރުމާއި ގުޅިގެން ރައީސް ނަޝީދު ކަންބޮޑުވުން ފާޅުކުރައްވާފައިވާއިރު، ދިވެހިރާއްޖޭއަށް ޓެކްސްގެ ނިޒާމް ތަޢާރަފް ކުރެއްވީވެސް އެމަނިކުފާނުގެ ވެރިކަމުގައެވެ. އެއަށްފަހު އެކި ފަހަރު މަތިން ޓެކްސްގެ ނިޒާމަށް އެކި ބަދަލު ވަނީ ގެނެވިފައެވެ.

އަދި ރައީސް ޞާލިހު ގެ މި ސަރުކާރުން ޓެކްސް ބޮޑު ކުރުމަށް ނިންމާފައިވަނީ، ދައުލަތަށް ލިބޭ އާމްދަނީ އިތުރުކޮށް ތަރައްގީގެ މަޝްރޫއުތައް ހުއްޓުމެއްނެތި ކުރިއަށް ގެންދިޔުމަށް ކަމަށް ސަރުކާރުން ވަނީ ބުނެފައެވެ.