އަމީނީ މަގު ޒަމާނީ ފެންވަރަށް ތަރައްގީ ކުރުމުގެ މަސައްކަތް އާރުޑީސީއާއި ހަވާލުކުރި މުއްދަތު އަންނަ ފެބުރުއަރީ މަހަށް ހަމަވުމުން އިތުރު 24 މަސް ދުވަސް އެ މަސައްކަތަށް ދިން ނަމަވެސް މިހާރު އެ މަސައްކަތް ހަވާލުކޮށްފައިވާ އާރުޑީސީއަށް އެކަން ނުކުރެވޭނެކަމަށް މާލޭ ސިޓީ ކައުންސިލްގެ ހުޅުމާލޭ ދާއިރާގެ މެމްބަރު އިބްރާހިމް ޝުޖާއު ވިދާޅުވެއްޖެ އެވެ. 

ޝުޖާއު މިފަދައިން ވިދާޅުވެފައިވަނީ މާލޭ ސިޓީގެ މޭޔަރު ޑރ މުހައްމަދު މުއިއްޒުއަށް 7 އަހަރުން މަރާމާތު ނުކުރެވުނު އަމީނީ މަގު ޒަމާނީ ފެންވަރަށް ތަރައްގީ ކުރުމުގެ މަސައްކަތް 7 މަސް ދުވަސްތެރޭ ނިންމާނެކަމަށް އާރުޑީސީގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) ވިދާޅުވެ ސިޓީ ކައުންސިލާއި ޗެލެންޖު ކުރައްވާފައި ތާރު ނާޅާ، ވެލިމަގެއްގެ ގޮތަށް އަމީނީ މަގުގެ ފުރަތަމަ ފިޔަވަހި ހުޅުވުމާއި ގުޅިގެން މޫކޭއަށް ފާޑުވިދާޅުވެ ކުރެއްވި ޓްވީޓެއްގައެވެ. 

އަމީނީ މަގު ތަރައްގީކުރުމުގެ މަސައްކަތް ސިޓީ ކައުންސިލްގެ އަތުން އަތުލުމަށްފަހު، އޭރު އެ މަސައްކަތް ކުރަމުން ދިޔަ އަގަށްވުރެ ދެ ގުނަ އަގުބޮޑުކޮށް ޕްލޭނިން މިނިސްޓްރީއިން އާރުޑީސީއާއި އެ މަސައްކަތް ހަވާލުކޮށްފައިވަނީ މިދިޔަ އަހަރުގެ ޖޫން މަހުގައެވެ. އަދި އެއީ 7 މަސްދުވަސް ތެރޭ ނިންމަން ކޮންޓްރެކްޓުކޮށްފައިވާ މަސައްކަތެކެވެ. 

Advertisement

އެހެން ނަމަވެސް އެ މަގުގެ ފުރަތަމަ ފިޔަވަހި އާންމުންނަށް ހުޅުވާލާފައިވަނީ ތާރު ނާޅައެވެ. އަދި މަގު ސާފުވެސް ނުކޮށެވެ. 

އެކަމާއި ގުޅޭގޮތުން ޝުޖާއު ވިދާޅުވީ މޫކޭ ދައްކަވަނީ ސައިޒަށްވުރެ ބޮޑެތި ވާހަކަތައްކަމަށެވެ. މޫކޭއަށް ކުރެވޭނީ އައިޖީއެމްއެޗްގައި ފެންޑާ ހެދުން ފަދަ މަޝްރޫއުތަކަށް ޝުޖާއު ވިދާޅުވިއެވެ.

އަދި އެއަށްވުރެ ބޮޑެތި ވާހަކަތައް ދައްކާ ބޮޑެތި މަޝްރޫއުތައް ހިންގެވުމަށް މޫކޭ ނޫޅުއްވުމަށްވެސް ޝުޖާއު ވަނީ އެދިވަޑައިގެންފައެވެ.