ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ޖަލަށް ލުމަކީ ދެވަނަ ދައުރެއް ހޯއްދެވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކޮށި މަގެއްކަމަށް އިދިކޮޅުން ބުނެފިއެވެ. 

އާއަހަރުގެ ތަހުނިޔާއާއެކު އިދިކޮޅުން ނެރުނު ބަޔާނެއްގައި ވަނީ ރައީސް ޔާމީން ޖަލަށްލީ ނުހައްގުން ހުކުމްކޮށްގެންކަން އިދިކޮޅުން ކުރަމުން އަންނަ ތުހުމަތުތައް ތަކުރާރުކޮށްފައެވެ. 

އެގޮތުން އިދިކޮޅު ކޯލިޝަނުން ބުނީ 2023 ވަނަ އަހަރު ފެށިގެން އައީ ދިވެހި ރައްޔިތުންގެ ޢުންމީދު ޤައުމުގެ ތަރައްޤީގެ ބާނީ ރައީސް ޔާމީން ޢަބްދުލްޤައްޔޫމްގެ މައްޗަށް ސިޔަސީ ނުފޫޒުން ޙަރާން ޙުކުމެއް ޖަހާ ޖަލުގެ ތޭރިތަކު ތެރެއަށް ލައިގެން އަނިޔާވެރިވަމުން ދަނިކޮށް ކަމަށާއި، އެމަނިކުފާނަށް ހަރާން ޙުކުމެއް ޖެހުމުގެ އެންމެ ބޮޑު ބޭނުމަކީ މިވަގުތު ރައީސުލްޖުމްހޫރިއްޔާގެ މަޤާމުގައި ހުރި އިބްރާހީމް ރައީސް އިތުރު ދައުރަކަށް އިންތިޚާބު ވުމަށް ކޮށާ މަގެއްގެ ގޮތުގައިކަން ދިވެހި އެންމެހައި ރައްޔިތުންނަށް ކަށަވަރުވާކަމަށެވެ. 

Advertisement

އޭގެ އިތުރުން އިދިކޮޅުން ބުނީ ރައްޔިތުންގެ ދިރިއުޅުމުގެ އަގު ބޮޑުކޮށް، ރައްޔތުން އަތުން 8 ޕަސެންޓް ގެ ޖީއެސްޓި ނަގާ ތަކެތީގެ އަގުބޮޑުކުރުމަކީ މި ސަރުކާރުން ރައްޔިތުންނަށް ދެމުން އައި ހިތްދަތިކަމާއި މާޔޫސްކަމަށް އިތުރުވި ބޮޅެއްކަމަށެވެ. 

އިދިކޮޅުން ބުނީ މި ފަދަ ހުރިހާ ކަމަކުން އަރައިގަނެވެން އޮތީ މިއަހަރު ރިޔާސީ އިންތިޚާބުގައި އިބްރާހީމް ރައީސް އާއި ސަރުކާރު ކޯލިޝަންގައި ހިމެނޭ ފަރާތްތައް ބަލިކޮށް ރައީސް ޔާމީން އަނބުރާ ވެރިކަމަށް ގެނެސްގެންކަމަށެވެ. 

ރައީސް ޔާމީން ޖަލުގައި ރަހީނުކޮށްގެން ގެންގުޅުނު ނަމަވެސް، އެމަނިކުފާނުގެ ހިތްވަރަށް ކުޑަވެސް ބަދަލެއް ނާންނަކަމަށާއި، އެމަނިކުފާނު ހިރީ ސާބިތުކަމާއެކުގައިކަމަށް އިިދިކޮޅިގެ ބަޔާނުގައި ބުނެފައިވެއެވެ. އަދި އެމަނިކުފާނުގެ އެ ހިތްވަރުން ހިތްވަރު ލިބިގަނެ ރައްޔިތުންވެސް ސާބިތުކަމާއެކު ތިއްބެވުމަށް އިދިކޮޅުން ވަނީ އިލްތިމާސްކޮށްފަ އެވެ.