މި މަހު 28 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގައި ވާދަކުރައްވާ އެމްޑީޕީގެ ރައީސް މުހައްމަދު ނަޝީދު ގެ ކެންޕެއިން މެނޭޖަރު ކަމަށް އެންމެ ފުރަތަަމަ އެމަނިކުފާނު ހުށަހެޅުއްވީ އެމްޑީޕީގެ ޗެއާޕާސަން ގެ ނާއިބު އަދި އިންތިހާބު ކޮމިޓީގެ ރައީސް އިބްރާހިމް ވަހީދު (އިބްރޭ) އަށް ކަމަށް އޭނާ ވިދާޅުވެއްޖެއެވެ.

އެމްޑީޕީ ޕްރައިމަރީގެ ކަންކަން އިންތިޒާމް ކުރުމަށް ނަގާފައިވާ ފަސް މެންބަރުންގެ ކޮމިޓީން މިއަދު ބޭއްވު ނޫސްވެރިންގެ ބައްދަލުވުމުގައި އެކޮމިޓީގެ ނަޒާހާތްތެރި ކަމާއި ގުޅޭ ގޮތުން ނޫސްވެރިޔަކު ކުރި ސުވާލަށް ޖަވާބު ދެއްވަމުން އިބުރޭ ވިދާޅުވީ، އެ ކޮމިޓީން ނިންމާ ކޮންމެ ކަމެއް ނިންމަމުން ދަނީ ވަރަށް ހާމަކޮށް ކަމަށެވެ.

"އަޅުގަނޑުގެ ނަޒާހާތްތެރި ކަމާއި ބެހޭގޮތުން އަޅުގަނޑަށް ހިޔެއް ނުވޭ ތި ސުވާލު ތިހެން އައިސް ފާނެ ކަމަށް. ރައީސް ނަޝީދުގެ ކެންޕެއިން މެނޭޖަރު ކަން އެންމެ ފުރަތަަމަ އޮފާ ކުރީ އަޅުގަނޑަށް. އެހެންވީމާ އެއްފަރާތެއްގެ މީހުން މި ކަމުގައި (އިންތިހާބު ކޮމިޓީގެ ކަންކަމުގައި) ހުސް އެއްފަރާތެއްގެ މީހުން ހުރި ކަމަށްވެސް ގަބޫލުކޮށްގެން ނުވާނެ. އަޅުގަނޑު ރައީސް ނަޝީދުގެ ކެންޕެއިން މެނޭޖަރު ކަމަށް ހުރި ނަމަ މިއަދު ތި ސުވާލު އަޅުގަނޑަށް ނުކުރާނެ". އިބުރޭ ވިދާޅުވިއެވެ.

Advertisement

އިބުރޭ އިތުރަށް ވިދާޅުވީ އިންތިހާބު ކޮމިޓީ ނަގާފައިވަނީ މީގެ ކުރިންވެސް ކޮމިޓީ ނަގަމުންދާ ގޮތަށް ކަމަށެވެ. ނަމަވެސް ސިޔާސީ ޕާޓީއެއްގެ މެމްބަރުންގެ ގޮތުގައި ތިބޭ ނަމަ، އެ މީހަކީ އެއީ ވަކި ފިކުރަކަށް ބުރަވާނެ މީހެއްކަން ފާހަގަކޮށް ވަހީދު ވިދާޅުވީ އޭގެ މާނައަކީ ކުރަމުން ދާ މަސައްކަތްތަކަށް ބުރޫތަކެއް އައުމެއް ނޫން ކަމަށެވެ.

"ސިޔާސީ ޕާޓީއެއްވީމަ، ކޮންމެ ބޭފުޅަކު ވެސް ކޮންމެވެސް އެއް ބޭފުޅަކަށް ތާއީދު ކުރާނެ. އަޅުގަނޑުވެސް ކުރާނެ ދެން ތިބި މީހުން ވެސް ކުރާނެ، އެކަމަކު އަޅުގަނޑުމެން ކޮންމެ ވެސް މީހަކަށް ތާއީދު ކުރުމަކީ، މި ކޮމިޓީން ކުރަން ޖެހޭ މަސައްކަތް ވަކި ފަރާތަކަށް ޖެހުނީ ނޫން ކަންނޭނގެ" އިބުރޭ ވިދާޅުވިއެވެ.

މިއާއެކު އިބުރޭ ވިދާޅުވީ، މި އިންތިޚާބުގައި ހުށަހެޅުނު ޝަކުވާތައް ވަރަށް ކައިރިން ބަލަމުން އަންނަ ކަމަށާއި އިންތިޚާބުގެ ސައްޙަކަން ކަށަވަރު ކުރަން އެ ކޮމިޓީން މަސައްކަތް ކުރާނެ ކަމަށެވެ.