މިދިޔަ 2022 ވަނަ އަހަރުގެ ޖުޑިޝަލް ސާވިސް ކޮމިޝަނުން، 3 ފަނޑިޔާރަކު މަގާމުން ވަކިކޮށް 11 ފަނޑިޔާރުން އަލަށް މަގާމަށް އައްޔަން ކޮށްފައިވާ ކަމަށް އެކޮމިޝަނުން ހާމަކޮށްފިއެވެ.

ޖޭއެސްސީން ނެރުނު ނިމުނު އަހަރުގެ އެކޮމިޝަންގެ މަސައްކަތްތަކުގެ ތަފާސް ހިސާބު ރިޕޯޓްގައި ވާގޮތުން، އެކޮމިޝަނަށް މިދިޔަ އަހަރު 393 ޝަކުވާ ހުށަހަޅާފައިވެއެވެ. މިއީ ފާއިތުވެދިޔަ 2021 ވަނަ އަހަރާއި އަޅާބަލާއިރު 2.72 އިންސައްތަ މަދު އަދަދެކެވެ. 2021 ވަނަ އަހަރު އެކޮމިޝަނަށް ހުށަހަޅާފައިވަނީ 404 ޝަކުވާއެވެ.

ނީގެ އިތުރުން، މިދިޔަ އަހަރު ޖޭއެސްސީ ބެލި މައްސަލަތަކުގެ ތެރެއިން 4 ފަނޑިޔާރެއް މަޤާމުން ވަކި ކުރުމަށް ނިންމައި، މަޖިލީހަށް ވަނީ ހުށަހަޅާފައިވާއިރު، އަދި 9 ފަނޑިޔާރެއްގެ ސްލޫކީ މައްސަލަ ބަލައި ނަސޭހަތް ދިނުމާއިއެކު ތަމްރީން ޕްރޮގުރާމު ފުރިހަމަ ކުރުމަށް ވަނީ އަންގައި 3 ފަނޑިޔާރަކު ސަސްޕެންޑް ކުރުމަށް ވަނީ ނިންމާފައެވެ.

އަދި ކޮމިޝަނުން ބެލި މައްސަލަތަކުގެ ތެރެއިން 24 މައްސަލައެއް ސާބިތު ކުރެވޭ މިންވަރަށް ހެކި ނެތިގެން ވަނީ ފައިލްކޮށްފައެވެ.

މީގެއިތުރުން، މިދިޔަ އަހަރު 12 ފަނޑިޔާރަކު ރިޓަޔާ ކުރައްވާފައިވާއިރު، 6 ފަނޑިޔާރަކު މަޤާމުން އިސްތިއުފާ ދެއްވާފައިވާ ކަން ތަފާސްހިސާބުތައް ދައްކައެވެ.

އަދި މިދިޔަ އަހަރު 11 ފަނޑިޔާރަކު އަލަށް އަޔަން ކުރައްވާފައިވެއެވެ. އޭގެ ތެރޭގައި ހިމެނެނީ ހައިކޯޓަށް އައްޔަން ކުރެވުނު 3 ފަނޑިޔާރަކާއި، ސްޕީރިއާ ކޯޓުތަކަށް އައްޔަން ކުރެވުނު 2 ފަނޑިޔާރަކާއި، މެޖިސްޓްރޭޓް ކޯޓުތަކަށް އައްޔަން ކުރެވުނު 6 ފަނޑިޔާރުންނެވެ.

ޖޭއެސްސީގެ ތަފާސްހިސާބުތައް ދައްކާ ގޮތުން މިދިޔަ އަހަރު ނިމިގެންދިޔައިރު، ޖުޑީޝަރީގައި 170 ފަނޑިޔަރުން އެބަތިއްބެވެ. އޭގެ ތެރޭގައި ހިމެނެނީ 147 ފިރިހެން ފަނޑިޔާރަކާއި، 23 އަންހެން ފަނޑިޔާރެކެވެ.