ކުރިއަށް އޮތް ރިޔާސީ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ކެންޑިޑޭޓް ކަނޑައެޅުމަށް ބާއްވާ ރިޔާސީ ޕްރައިމަރީގައި ވޯޓުލެވޭ މެމްބަރުންގެ ލިސްޓު އާންމުކޮށްފި އެވެ. 

އެމްޑީޕީގެ ރިޔާސީ ޕްރައިމަރީ ބޭއްވުމަށް ނިންމާފައިވަނީ މި މަހުގެ 28 ގައެވެ. މި އިންތިޚާބުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި މަޖިލީހުގެ ރައީސް މުހައްމަދު ނަޝީދު ވާދަކުރައްވާނެއެވެ. 

މި އިންތިޚާބުގައި ވޯޓުލުމުގެ ހައްގު ލިބިފައިވާ ފަރާތްތަކުގެ ލިސްޓު އާންމުކޮށްފައި ވާއިރު، ޖުމްލަ 57255 މީހުން އެ ލިސްޓުގައި ހިމެނެއެވެ. 

Advertisement

ވޯޓާސް ލިސްޓަށް ޝަކުވާ ހުށަހެޅުމުގެ ފުރުސަތު އާދީއްތަ ދުވަހު ބަންދުވި އިރު 900 އެއްހާ މީހުންގެ ޝަކުވާ ލިބިފައިވާ ކަމަށް އިންތިހާބުގެ ކަންކަން ކުރިއަށް ގެންދާ ކޮމެޓީން ވަނީ ވިދާޅުވެފައެވެ.

އޭގެ ތެރެއިން 683 މީހުން އިލެކްޝަންސް ކޮމިޝަން (އީސީ) ގެ ދަފްތަރުގައި އެއްވެސް ޕާޓީއެއްގައި ނުހިމެނޭ ކަމަށާއި 212 މީހުންނަކީ އެހެން ޕާޓީތަކުގެ މެންބަރުން ކަމަށް ކޮމެޓީން ވަނީ ވިދާޅުވެފައެވެ.

އޭގެ ތެރެއިން މިދިޔަ އަހަރު ޑިސެމްބަރު 18 ގެ ނިޔަލަށް އީސީގެ ދަފްތަރުގައި އެމްޑީޕީގައި ރަޖިސްޓާ ކޮށްފައި ތިބި މެންބަރުން ފިޔަވައި އެހެން އެއްވެސް މެންބަރަކު ވޯޓާސް ލިސްޓަށް އިތުރު ކުރުމުގެ ވިސްނުމެއް ނެތް ކަމަށް ވެސް ކޮމެޓީން ވަނީ ވިދާޅުވެފައެވެ.

އެމްޑީޕީގެ ރިޔާސީ ޕްރައިމަރީގައި ވޯޓުލެވޭނެ މީހުންގެ ލިސްޓު އާންމުކޮށްފައިވާއިރު، މި އިންތިޚާބުގައި ވާދަކުރައްވާ ރައީސް ނަޝީދު ގެންދަވަނީ އެމްޑީޕީގެ ދަފްތަރުން 39000 މެމްބަރުން ވަކިކޮށްފައިވާކަމަށް ބުނެ ކަންބޮޑުވުން ފާޅުކުރަމުންނެވެ.

އަދި ވަކިކުރި މީހުންގެ ތެރޭގައި ނަޝީދުގެ ވަފާތެރިންވެސް ހިމެނޭކަމަށް ނަޝީދު ވަނީ ތުހުމަތުކުރައްވާފަ އެވެ.