ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން މިރޭ މާލޭގައި ކުރަމުންދާ މުޒާހަރާގެ ތެރެއިން މާލޭ ސިޓީގެ މޭޔަރު ޑރ މުހައްމަދު މުއިއްޒު ހައްޔަރުކޮށްފި އެވެ.
ވ އާރަށުގެ މުއާމަލާތާއި ގުޅުވާ ރައީސް ޔާމީންގެ މައްޗަށް ކްރިމިނަލް ކޯޓުން ހުކުމް ކުރުމާއި ގުޅިގެން އިދިކޮޅުން ގެންދަނީ އެމަނިކުފާނު މިނިވަންކުރުމަށް ގޮވާލާ އަޑުއުފުލަމުންނެވެ. އެގޮތުން އެމަނިކުފާނުގެ މައްޗަށް ކޮށްފައިވަނީ ސިޔާސީ ނުފޫޒު ފޯރުވައިގެން ކޮށްފައިވާ "ހަރާން" ހުކުމެއް ކަމަށާއި، އެ ހުކުން ގަބޫލު ނުކުރާކަމަށް އިދިކޮޅުން ވަނީ ބުނެފައެވެ.
އެގޮތުން މިރޭ 9:00 އޭޑީކީ ކަންމަތިން އިދިކޮޅުގެ އިހުތިޖާޖު ފަށާފައިވާއިރު އެ އިހުތިޖާޖު ލީޑުކުރައްވަމުން ގެންދެވީ އިދިކޮޅުގެ ލީޑަރޝިޕްގެ މެމްބަރުންނެވެ. މާލޭ ސިޓީގެ މޭޔަރު ޑރ މުހައްމަދު މުއިއްޒުވެސް އިހުތިޖާޖުގައި ބައިވެރިވެވަޑައިގެން އަޑު އުފުއްލަމުން ގެންދެވިއެވެ.
ރައީސް ޔާމީން މިނިވަންކުރުމަށް ގޮވާލާ ކުރިއަށް ގެންދިޔަ އިހުތިޖާޖުގެ އިސްސަފުގައި ޑރ މުއިއްޒު ހަރަކާތްތެރިވަނީ
އެހެން ނަމަވެސް ސުލްހަވެރިކަމާއެކު ފެށި އެ އިހުތިޖާޖު ރޫޅާލުމަށް ފުލުހުން ވަނީ މަސައްކަތްކޮށްފައެވެ. އަދި އިހުތިޖާޖުގެ ބައިވެރިން ފަހަތައް ޖެއްސުމަށް ހާލަތާއި ނުބައްދަލު ބާރުގެ ބޭނުން ކުރަމުން ދިޔަ މަންޒަރު ފެނިގެން ދިޔައެވެ.
މާލޭ ސިޓީގެ މޭޔަރު ޑރ މުއިއްޒު ހައްޔަރުކޮށްފައިވަނީ އިހުތިޖާޖު ރޫޅާލުމަށް ފުލުހުން ކުރި މަސައްކަތުގެ ތެރެއިންނެވެ. ޑރ މުއއިްޒުގެ އިތުރުންވެސް އިހުތިޖާޖުގެ ބައިވެރިންތަކެއް ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.
މާލޭގައި ސިސްސިލާގޮތެއްގައި އިދިކޮޅުން އަޑުއުފުލަމުންދާއިރު، ގިނަ އަދަދެއްގެ ބަޔަކު އެ އިހުތިޖާޖުތަކުގައި ބައިވެރިވެ އަޑުއުފުލަމުންދާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
