ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ގެ ކެންޕެއިން ދަތުރެއް ނ އަތޮޅަށް ކުރުމަށް ހަމަޖެހިއްޖެއެވެ. 

ޕީއެންސީގެ ރައީސް އަބްދުއްރަހީމް ކުރެއްވި ޓްވީޓެއްގައި އޭނާ ވަނީ، ރައީސް ޔާމީން ގެ ކެންޕެއިން ދަތުރެއް މި މަހު 6 ވަނަ ދުވަހުން ފެށިގެން 10 ވަނަ ދުވަހާއި ހަމައަށް ނ އަތޮޅަށް ކުރުމަށް ހަމަޖެހިފައިވާ ކަމަށެވެ.

ރައީސް ޔާމީންގެ ކެމްޕެއިން ދަތުރު ކުރާނެކަން އިދިކޮޅުން އިއުލާން ކޮށްފައިވާއިރު, އެމަނިކުފާނު މިވަގުތު ހުންނެވީ، ވ. އާރަށު މައްސަލަ އާއި ގުޅިގެން އެމަނިކުފާނުގެ މައްޗަށް ދައުލަތުން ކުރި ދައުވާތައް ސާބިތުވާ ކަމަށް ކަނޑައަޅައި 11 އަހަރު ދުވަހަށް އެމަނިކުފާނު ޖަލަށް ލާން ހުކުމް ކުރުމާއި ގުޅިގެން ޖަލުގައެވެ. 

އެހެން ކަމުން މި ކެންޕެއިން ގައި އެމަނިކުފާނަށް ބައިވެރިވެ ވަޑައިނުގެންނެވޭނެއެވެ. އެހެން ނަމަވެސް މީގެ ކުރިން ކޮށްފައިވާ އެމަނިކުފާނުގެ ކެމްޕެއިން ދަތުރުތަކުގައި އެމަނިކުފާނު ވަނީ ބައިވެރިވެ ވަޑައިގެންފަ އެވެ. 

ރައީސް ޔާމީން 11 އަހަރަށް ޖަލަށް ލާން ހުކުމް ކޮށްފައިވީ ނަމަވެސް އެމަނިކުފާނުގެ ކެމްޕެއިން ގެ ކަންކަން ކުރިއަށް ގެންދަވާނެކަމަށް އިދިކޮޅުން ވަނީ ބުނެފައެވެ. އަދި އެމަނިކުފާނުގެ މައްޗަށް ކްރިމިނަލް ކޯޓުން ކޮށްފައިވަނީ ހަރާމް ހުކުމެއް ކަމަށާ، އެމައްސަލަ މަތީ ކޯޓަށް ހުށަހަޅައިގެން ރައީސް ޔާމީން މިނިވަން ވެވަޑައިގަންނަވާނެކަމަަށްވެސް އިދިކޮޅުން ބުނެއެވެ. 

މީގެ އިތުރުން، ޖަލުން މިނިވަންވެ ވަޑައިގަތުމާއިއެކު، ކެންޕެއިން ގެ ކަންތަކުގައި ޢަމަލީގޮތުން ރައީސް ޔާމީން ބައިވެރިވެ ވަޑައިގަންނަވާނެ ކަމަށްވެސް ބުނެފައިވެއެވެ.