ކުރީގެ ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން މިރޭ އާޓިފިޝަލް ބީޗުގައި ބާއްވަން އިއުލާނުކުރި ހަރަކާތަކީ މާކުރިން ރާވާފައިވާ ހަރަކާތެއްކަމަށް އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވިދާޅުވެއްޖެ އެވެ.
ހީނާ މިފަދައިން ވިދާޅުވެފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބައިވެރިވެވަޑައިގަންނަވާ އެމަނިކުފާނުގެ ކެމްޕޭނު ޖަލްސާއެއް މިރޭ އެމްޑީޕީގެ މައި ހަރުގޭގައި ބޭއްވުމަށް ނިންމާފައިވަނިކޮށް ޕީޕީއެމްގެ ހަރަކާތެއް އާޓިފިޝަލް ބީޗުގައި ބޭއްވުމަށް ނިންމީ އެ ޖަލްސާއަށް އުނދަގޫކުރުމަށް ކަމަށް ދެކެވޭ ވާހަކަދައް ދޮގުކުރައްވާ ކުރެއްވި ޓްވީޓެއްގައެވެ.
އެގޮތުން ހީނާ ވިދާޅުވީ އިދިކޮޅުގެ އެ ހަރަކާތަކީ މާ ކުރިން ހާވައިފައިވާ ހަރަކާތެއްކަމަށެވެ. އަދި އެ ހަރަކާތް ކުރިއަށް ގެންދިއުމަށް މާލޭ ސީޓީ ކައުންސިލްގެ ހުއްދަވެސް ލިބިފައިވާކަމަށް އިދިކޮޅުން ވަނީ ބުނެފައެވެ.
އިދިކޮޅުން މިރޭ އާޓިފިޝަލް ބީޗު ސަރަހައްދުގައި ޚާއްސަ ހަރަކާތެއް ބާއްވަން އިއުލާނުކޮށްފައިވާއިރު، އިދިކޮޅުން ގެންދަނީ ރައީސް ޔާމީން މިނިވަންކުރުމަށް ގޮވާލާ މާލޭގެ އެކި ސަރަހައްދުތަކުގައި އަޑުއުފުލަމުންނެވެ. އަދި ސިލްސިލާގޮތެއްގައި މަގުމަތީގެ ހަރަކާތްތައް ކުރިއަށް ގެންދަމުންނެވެ.
އެހެންކަމުން، މިރޭ 8:45 ގައި އޮންނަ އެ ހަރަކާތަކީ އެއްވެސް ހާލަތެއްގައި ރައީސް ސޯލިހުގެ ޖަލްސާ ބާއްވާތީ ކުރިއަށް ގެންދާ ހަރަކާތެއް ނޫންކަމަށް އިދިކޮޅުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
