އެމްޑީޕީގެ ރިޔާސީ ޕްރައިމަރީގައި ތާއީދު ހޯއްދެވުމަށް އެމްޑީޕީގެ ރައީސް މުހައްމަދު ނަޝީދު ހިޔާ ސަރަހައްދަށް ކުރެއްވި ޒިޔާރަތުގައި ކުރިއަށް ގެންދިޔަ ޑޯ-ޓު-ޑޯ ހަރަކާތުގައި އެންމެ ފްލެޓަކަށް ވަދެވަޑައިގަތުމަށްފަހު އެ ސަރަހައްދު ދޫކުރައްވާ ވަޑައިގެންފި އެވެ. 

ނަޝީދު ހިޔާ ސަރަހައްދަށް ވަޑައިގަތުމާއި އެކު އެ ސަރަހައްދުގައި ދިރުއުޅޭ ރައްޔިތުން ވަނީ ނުރުހުން ފާޅުކޮށް އަޑުއުފުލާފަ އެވެ. 

ފޯރިގަދަ ކެމްޕޭނު ހަރަކާތްތަކެއް މާލޭގައި ބޭއްވުމަށްފަހު މިއަދު ހަވީރު ހިޔާ ސަރަހައްދުގައި ހަމަ އެފަދަ ހަރަކާތެއް ބާއްވާނެކަމަށް މީގެ ކުރިން ނަޝީދުގެ ކެމްޕޭނު ޓީމުން އިއުލާނު ކުރި ނަމަވެސް އެ ހަރަކާތް ކުރިއަށް ގެންދިއުމަށް ނަޝީދު ހިޔާ ސަރަހައްދަށް ވަޑައިގަތުމުން އެ ސަރަހައްދުގައި ދިރިއުޅޭ ރައްޔިތުން ނަޝީދަށް މަރުހަބާ ކިޔާފައެއް ނުވެއެވެ. 

Advertisement

އޭގެ ބަދަލުގައި ގިނަ އަދަދެއްގެ ބަޔަކު ވަނީ ނަޝީދާއި ދެކޮޅަށް އަޑުއުފުލާ ނަޝީދު މީގެ ކުރިން ހިޔާ ފްލެޓާއި ގުޅޭގޮތުން ދައްކަވާފައި ހުރި ވާހަކަތައް ހަނދާންކޮށްދީފައެވެ. 

ގިނަ ބަޔަކު ނަޝީދާއި ދެކޮޅަށް ނުރުހުން ފާޅުކުރަމުން ދިއުމާއި ގުޅިގެން މިއަދު ރާވާފައިވާ ނަޝީދުގެ ކެމްޕޭނު ހަރަކާތްވެސް ވަނީ ކުރުކޮށްލާފައެވެ. އަދި ނަޝީދުގެ ވާހަކަފުޅުވެސް ކުރިއަށް ގެންދެވީ ވަރަށް ކުރުކޮށެވެ. 

މިއަދު ހަވީރު ނަޝީދު ވަނީ އެ ސަރަހައްދުގައި ޑޯ-ޓު-ޑޯ ހަރަކާތެއް ކުރިއަށް ގެންގޮސްފައެވެ. އެ ހަރަކާތުގެ ތެރެއިންވެސް ނަޝީދު ވަޑައިގެންފައިވަނީ ހިޔާގެ އެންމެ ފްލެޓަކަށެވެ. 

އެފަހުން ނަޝީދު ވަނީ ހިޔާ ސަރަހައްދު ދޫކުރައްވާ ވަޑައިގެންފައެވެ. 

ރައީސް ނަޝީދަކީ ހިޔާ ފްލެޓުތަކަކީ ކޮތަރު ކޮށިތަކެއްގެ ގޮތުގައި ސިފަކުރައްވާ އެތަން ދޫކޮށްލުމަށް ގޮވާލެއްވި ބޭފުޅެވެ. އެއީ އިންސާނުން ދިރިއުޅެން ހެޔޮވާ ވަރުގެ ތަނެއް ނޫންކަމަށް މީގެ ކުރިން ނަޝީދު ވިދާޅުވެފައިވެއެވެ. 

ހިޔާ ފްލެޓުތަކުގެ ކުލި މި ސަރުކާރުން ބޮޑުކުރުމުެގ އިތުރުން ހިޔާ ފްލެޓުތަކުގެ ފިނިޝިން މަސައްކަތް ނުނިންމާ ހަވާލުކުރާތީ ރައްޔިތުންގެ ހުރި ކަންބޮޑުވުންތައް ހުށައެޅުމުން މީގެ ކުރިން ނަޝީދު ވިދާޅުވެފައިވަނީ އެމަނިކުފާނަށް އެކަންކަން ހައްލުކުރުމަށް ކޮށްދެވޭނެ ކަމެއް ނެތްކަމަށެވެ. 

އެހެން ކަމުން ރިޔާސީ އިންތިޚާބު ބޯމަތިވުމުން ހިޔާ ސަރަހައްދަށް ތާއީދު ހޯއްދެވުމަށް ނަޝީދު ވަޑައިގަތަސް އެކަން ބަލައިގަންނަން ބޭނުން ނުވާކަމަށް އެ ސަރަހައްދުގައި ގިނަ ރައްޔިތުންތަކެއް ވަނީ ބުނެފައެވެ.