ވަޒީފާގެ ބިރޭ ކިޔައިގެން ވާހަކަ ދެއްކުމަކީ ވެރިކަން ކުރާ މައި ޕާޓީ, އެމްޑީޕީގެ ހިއްވަރު ގަދަ މެމްބަރުންނަށް ކުރެވޭ ބޮޑު މަލާމާތެއް ކަމަށް ބުނެ ޑިފެންސް މިނިސްޓަރު މާރިޔާ އަހުމަދު ދީީީީދީ، ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ރައްދު ދެއްވައިފިއެވެ.
މިހާރު ކުރިއަށްދާ އެމްޑީޕީގެ ޕްރައިމަރީ ކެމްޕޭނުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ތާއީދުނުކުރާ މުވައްޒަފުންނަށް ވަޒީފާގައި ނުތިބެވޭނެކަމަށް ވިދާޅުވެ ބައެއް ވަޒީރުން އިންޒާރުދެމުންދާކަމަށް އެމަނިކުފާނާ ވާދަކުރައްވާ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ކެމްޕެއިން ޓީމުން ތުހުމަތުކޮށް ވަނީ ބަޔާނެއް ނެރެފައެވެ.
އެ ބަޔާނަށް ރައްދު ދެއްވައި އެމްޑީޕީ ޕްރައިމަރީގެ ރައީސް ޞާލިހުގެ ތަރުޖަމާނު މާރިޔާ ކުރެއްވި ޓުވީޓެއްގައި ވިދާޅުވީ، އެމްޑީޕީ އަކީ ވަޒީފާގެ ބިރަށް ފަސް ނުޖެހުނު މީހުންގެ ޕާޓީ ކަމަށެވެ.
"ވަޒީފާގެ ބިރޭ ކިޔައިގެން ވާހަކަ ދެއްކުމަކީ މި ބިޔަ ބޮޑު ޕާޓީ ގެ ހިއްވަރު ގަދަ މެމްބަރުންނަށް ކުރެވޭ ބޮޑު މަލާމާތެއް!" މާރިޔާ ވިދާޅުވިއެވެ.
ރައީސް ނަޝީދުގެ ކެމްޕެއިން ޓީމުން މިއަދު ނެރުނު ބަޔާނެއްގައި ބުނެފައިވަނީ 2018 ވަނަ އަހަރުގައި އެމްޑީޕީގެ މެންބަރުން ނިކުމެ ބަދަލުކުރާން ވޯޓުލީ އެތައް ކަމެއް އަނބުރާ އިއާދަވަމުންދާކަމުގެ ޝަކުވާ ޕާޓީގެ މެންބަރުންގެ ފަރާތުން ލިބިފައިވާ ކަމަށެވެ.
އެގޮތުން ދައުލަތުގެ ވަޒީފާތަކުގައި ތިބި ނަޝީދަށް ތާއީދުކުރާ މުވައްޒަފުން އެމީހުން ވަޒީފާ އަދާކުރާ ރަށްނޫން އެން ރަށްރަށުގެ ވަޒީފާތަކަށް ބަދަލުކުރަމުންދާކަމުގެ ޝަކުވާ ލިބެމުންދާ ކަމަށާއި، އެގޮތަށް ވަޒީފާ ބަދަލުކުރުމުގެ ބޭނުމަކީ ވޯޓުލުން އޮންނަ ދުވަހު ވޯޓުން މަހުރޫމުކުރުމާއެކު އެމީހުންގެ ރަށްރަށުގައި ރައީސް ނަޝީދަށް ތާއީދު ހޯދަން މަސައްކަތްކުރުމުން ދުރުކުރުން ކަމަށް އެ ބަޔާނުގައި ބުނެފައިވެއެވެ.
އަދި ރައީސް ޞާލިޙުގެ ކެމްޕޭން ހަރަކާތްތަކުގައި ބައިވެރިވާން ސަރުކާރު ކުންފުނިތަކުގެ މުވައްޒަފުންނަށް އެ ކުންފުނިތަކުގެ ވެރިން އަންގަވައި، އެ ހަރަކާތްތަކަށް ނުދާ މުވައްޒަފުންނާމެދު ފިޔަވަޅުއަޅާނެކަމުގެ އިންޒާރުދެމުންދާކަމަށް އެ ބަޔާނުގައި ތުހުމަތުކޮށްފައިވެއެވެ.
ހަމައެހެންމެ ރައީސްގެ ކެމްޕޭނަށް ސަރުކާރުގެ އޮފީސްތައް ބޭނުންކުރަމުންދިއުމާއި، ސަރުކާރުގެ އިސް ބައެއް ވެރިން މަޤާމުގެ ނާޖާއިޒު ބޭނުން ހިފަމުން އަންނަކަމުގެ ޝަކުވާވެސް ނަޝީދުގެ ކެމްޕެއިން ޓީމަށް ލިބިފައިވާކަމަށް އެ ޓީމުން ބުނެއެވެ.
"މީގެ އިތުރުން، ވާދަވެރި ކެނޑިޑޭޓު ރައީސް އިބްރާހީމް މުޙައްމަދު ޞާލިޙަށް ތާއީދުނުކުރާ މުވައްޒަފުންނަށް ސަރުކާރުން އެކި ގޮތްގޮތުން ބިރުދައްކަމުންދާކަމުގެ ޝަކުވާތައްވެސް ދަނީ ލިބެމުންނެވެ. އެގޮތުން، ވާދަވެރި ކެނޑިޑޭޓަށް ތާއީދުނުކުރާ މުވައްޒަފުންނަށް ވަޒީފާތަކުގައި ނުތިބެވޭނެކަމަށް ބުނެ ބައެއް މިނިސްޓަރުން މިނިސްޓްރީތަކުގެ މުވައްޒަފުންނަށް ބިރުދައްކައި އިންޒާރުދަމުންދާކަމުގެ ޝަކުވާތައްވެސް ލިބެމުންދެއެވެ.،" ނަޝީދުގެ ކެމްޕޭން ޓީމުން ނެރުނު ބަޔާނުގައި ބުނެފައިވެއެވެ.
މިއާއެކު އެ ބަޔާނުގައި ވަނީ މެންބަރުންނަށް ދައްކާ ވަޒީފާގެ ބިރަށް ފަހަތަށް ނުޖެހި، އެ މެންބަރުންގެ ސިޔާސީ ފިކުރާ އެއްގޮތަށް މަސައްކަތްކުރުމަށް ސަރުކާރުގައި ވަޒީފާ އަދާކުރާ އެމްޑީޕީގެ އާންމު މެންބަރުންނަށް އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
