ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން ކުރަމުންދާ މުޒާހަރާއަށް ފުލުހުން ހުރަސްއަަޅައިފި އެވެ. 

ނިމިދިޔަ ޑިސެމްވަރު މަހުގެ 25 ގައި ރައީސް ޔާމީންގެ މައްޗަށް ކްރިމިނަލް ކޯޓުން 11 އަހަރު ދުވަހުގެ ޖަލު ހުކުމެއް އިއްވާފައިވާއިރު އިދިކޮޅުން ވަނީ އެ ހުކުމް ބަލައި ނުގަންނަކަމަށް ބުނެފައެވެ. އަދި އެ ހުކުމަކީ "ހަރާން" ހުކުމެއްކަމަށް ބުނެ އިދިކޮޅުން ދަނީ ސިލްސިލާގޮތެއްގައި މުޒާހަރާ ކުރަމުންނެވެ. 

އެގޮތުން މިރޭވެސް މާލޭގައި އިދިކޮޅުން ވަނީ ރައީސް ޔާމީން މިނިވަންކުރުމަށް ގޮވާލާ އަޑުއުފުލާފަ އެވެ. 

އިދިކޮޅުން މުޒާހަރާ ފެށިތާ ކުޑަ ވަގުތުކޮޅެއްގެ ތެރޭގައި ފުލުހުން ވަނީ އެ މުޒާހަރާއަށް ހުރަސްއަޅާފަ އެވެ. ސުލްހަވެރި ކަމާއެކު އަޑުއުފުލަމުން ދިޔަ މީހުން ފަހަތައް ޖެއްހުމަށް ފުލުހުން ވަނީ ބާރުގެ ބޭނުންކޮށްފަ އެވެ. 

އަދި މުޒާހަރާ ރޫޅާލުމަށް ގިނަ އަދަދެއްގެ ފުލުހުން ވަނީ ހަރަކާތްތެރިވެފަ އެވެ. މުޒާހަރާ ރޫޅާލުމުގެ ތެރެއިން މިހާތަނަށް 11 މީހުން ވަނީ ހައްޔަރުކޮށްފަ އެވެ. 

އިދިކޮޅުގެ މުޒާހަރާއަށް ފުލުހުން ހުރަސްއަޅާފައިވާއިރު ނިމިދިޔަ ބުދަ ދުވަހުގެ ރޭ އެމްޑީޕީ ހަރުގޭގައި ބޭއްވި ޖަލްސާއެއްގައި ވާހަކަދައްކަވަމުން ރައީސް ޞާހިލު ވިދާޅުވީ އެމަނިކުފާނުގެ ވެރިކަމުގައި ޚިޔާލު ފާޅުކުރުމުގެ ހައްގު ތަންމިނަށް ހުޅުވާލެވިއްޖެކަމަށެވެ. އަދި މީހުން ހައްޔަރު ނުކޮށްވެސް ވެރިކަން ކުރެވިދާނެކަން ދައްކާދެވިއްޖެކަމަށެވެ. 

ރައީސް ސޯލިހު އެފަދައިން ވިދާޅުވެފައިވީނަމަވެސް އިދިކޮޅުގެ މުޒާހަރާގެ ތެރެއިން ފާއިތުވި 2 ހަފްތާ ތެރޭ 70 އަށްވުރެ ގިނަ މީހުން ހައްޔަރުކޮށްފައިވާކަން އިދިކޮޅުން ވަނީ ހާމަކޮށްފަ އެވެ.