ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، ރައީސް މުހައްމަދު ނަޝީދަށް ވުރެ "މައުމޫނީ ފިކުރު" ބޮޑު މީހަކީ ކާކުތޯ ރައްޔިތުންގެ މަޖިލީހުގެ ދުވާފަރު ދާއިރާގެ މެންބަރު އިސްމާއިލް އަހުމަދު ސުވާލުކުރައްވައިފިއެވެ. 

އެމްޑީޕީގެ ރިޔާސީ ޕްރައިމަރީއަށް ކުރިމަތިލައްވަނީ "މައުމޫނީ ފިކުރެއް" އުފަންވަމުން ދާތީ އެކަމާ ކަންބޮޑުވެ ވަޑައިގެންނެވުމުން ކަމަށް ރައީސް ނަޝީދު ވިދާޅުވުމާއި ގުޅިގެން އެކަމަށް ރައްދު ދެއްވައި އިއްސެ ކުރެއްވި ޓްވީޓެއްގައި އޭނާ ވަނީ ރައީސް ނަޝީދަށް ވުރެ މައުމޫނީ ފިކުރު ބޮޑު މީހަކީ ކާކުތޯ ސުވާލު ކުރައްވާފަ އެވެ. 

"ޕާޓީ ރައީސް! މަޖިލީސް ރައީސް! ބޮޑު ވަޒީރު! 2008، 2013، 2018، 2023ގެ ރިޔާސީ ޓިކެޓު! އަމިއްލަ ހަރު މުދަލަށް އެމްޑީޕީ ހަދައި ތަފާތު ހިޔާލު މީހާ ހަވަރަށްދީ، ތާއަބަދު ވެރިކަން ބޮޑުކަން އަތްގަދަކަމަށް ތޮޅެނީ ކާކުތޯ؟" އިއްސެ ވިދާޅުވި އެވެ. 

އެމްޑީޕީގެ ރިޔާސީ ޕްރައިމަރީ މިމަހު 28 ގައި ބާއްވާ އިރު، ދުވަސް ކައިރިވަމުން އަންނަ ވަރަށް ކެންޕެއިން ފޯރިގަދަވެ އެއް ބޭފުޅަކު އަނެއް ބޭފުޅަކަށް ދެމުންދާ ބަހުގެ ހަމަލާތައް ވެސް  އަންނަނީ ހޫނުވަމުންނެވެ.

އެގޮތުން ދ ކުޑަހުވަދު އަށް ވަޑައިގެން އެ ރަށުގައި ވާހަކަފުޅު ދައްކަވަމުން ނަޝީދު ވިދާޅުވީ ތަރައްގީ ލިބޭނީ ވަޒީރުންނާއި ދައުލަތުގެ ވަޒީރުންގެ ކިބައިން އާދޭސްކޮށްގެން ކަމަށް ދެކިގެން ނުވާނެ ކަމަށެވެ. އަދި ކުރިން ރަައްޔިތުންނަށް ތަރައްގީ ލިބެނީ މަޖިލިސް މެމްބަރުންނާއި ވަޒީރުންނަށް ކަންކަން ކޮށްދީގެން ކަމަށް ވިދާޅުވެ، ވެރިކަމަށް އަލުން ކުރިމަތިލައްވަނީ އެ ފިކުރު އުފަންވަމުން ދާތީ އަދި އެކަމާ ކަންބޮޑުވާތީ ކަމަށް ވިދާޅުވި އެވެ.

"އަޅުގަނޑު އަލުން ނުކުމެ އެނބުރި އައިސް މި ހުރީ ކަންބޮޑުވެގެން. އަޅުގަނޑުމެންގެ ތެރޭގައި ޑިމޮކްރަސީއާ ދުރު، އަޅުގަނޑު ދަންނަވާނީ މައުމޫނީ ފިކުރެއް އެބަ ވަދެއޭ،" ކުރީގެ ރައީސް މައުމޫން އަބްދުލްގައްޔޫމްގެ ވެރިކަމަށް އިޝާރާތް ކުރައްވައި، ނަޝީދު ވިދާޅުވި އެވެ.