ވެރިކަމުގައި ހުންނަވާ ބޭފުޅަކު މާބޮޑަށް ރިއެކްޓު ކުރެއްވުމަކީ ބައެއްފަހަރު ވެރިކަން ވެއްޓޭކަމެއް ކަމަށް ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާނު ހުސެއިން ވިދާޅުވެއްޖެ އެވެ. 

ހިސާން މިފަދައިން ވިދާޅުވެފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ރިއެކްޓު ނުކުރައްވާކަމަށް ވިދާޅުވެ މަޖިލީހުގެ ރައީސް މުހައްމަދު ނަޝީދު ދައްކަވަމުންދާ ވާހަކަތަކަށް ރައްދުދެއްވާ ރޭ ނ ވެލިދޫގައި އޮތް ރައީސް ޞާލިހުގެ ކެމްޕޭނު ޖަލްސާގައި ވާހަކަދައްކަވަމުން ނެވެ. 

ރައީސް ނަޝީދުގެ ވަފާތެރިއެއްގެ ގޮތުގައި ގިނަ ދުވަސްތަކެއްވަންދެން ހުންނެވި ހިސާސް ހުސެއިން ނަޝީދަށް އަމާޒުކުރައްވާ ވިދާޅުވީ ކަންކަމުގައި މާ ގަދައަށް ރިއެކްޓު ކުރުމަކީ މާ ގަދަކަމެއް ނޫންކަމަށެވެ. އަދި ކުއްލި ކުއްލިއަށް ކަންކަމުގައި ރިއެކްޓު ކުރައްވާނަމަ ނިކުންނާނެ ނަތީޖާވެސް މާ ރަނގަޅު ނުވާނެކަމަށް ވިދާޅުވިއެވެ. 

ބައެއް ފަހަރު ކުއްލި ކުއްލިއަށް ރިއެކްޓު ކުރުމުގެ ސަބަބުން ވެރިކަން ވެއްޓޭތަންވެސް ފެންނަކަމަށް ހިސާން ވިދާޅުވިއެވެ. 

ހިސާންގެ ވާހަކައިގައި އިޝާރާތް ކުރައްވާފައިވަނީ ރައީސް މުހައްމަދު ނަޝީދުގެ ވެރިކަން ބަދަލުވެގެން ދިޔަ ގޮތަށްކަމަށް ބެލެވެއެވެ. 

ނަޝީދުގެ ވެރިކަން ބަދަލުވީ ބަޣާވާތްކޮށް، އިސްތިއުފާދިނުމަށް މަޖުބޫރުކޮށްގެންކަމަށް މީގެކުރިން އެމްޑީޕީއިން ބުނަމުން ދިޔަ ނަމަވެސް އެމްޑީޕީގެ ރިޔާސީ ޕްރައިމަރީއާއި ދިމާކޮށް އެ ހާދިސާގެ ތަރުޖަމާތަކަށް ބޮޑެތި ބަދަލުތަކެއް ވަނީ އައިސްފައެވެ. އަދި ނަޝީދަށް ވެރިކަން ގެއްލުނީ ޚުދު އެމަނިކުފާނަށް އެ ދުވަހުގެ ހާލަތު ކޮންޓްރޯލުކުރަން ނޭނގުމުންކަމަށް ދޭހަވާ މޭރުމުން އެމްޑީޕީގެ މެމްބަރުން ދަނީ ވާހަކަދައްކަވަމުން ނެވެ. 

ޚުދު ރައީސް ޞާލިހުވެސް ވަނީ ފަސްއަހަރުގެ ދައުރެއް ލިބިވަޑައިގެންފިނަމަ ތިން އަހަރުކޮށްފައި ވެރިކަން ދޫކޮށް ނުލައްވާނެކަމަށް ވިދާޅުވެ ނަޝީދަށް ބަހުގެ ހަމަލާތަކެއް ރައްދުކުރައްވާފަ އެވެ.