އެމްޑީޕީގެ ރިޔާސީ ޕްރައިމަރީ ކާމިޔާބު ކުރެވިއްޖެނަމަ، ރަނިން މޭޓެއްގެ ގޮތުގައި އިޚްތިޔާރު ކުރައްވާނީ އައްޑޫ ސިޓީ އަށް ނިސްބަތްވާ ބޭފުޅެއް ކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ އެމްޑީޕީގެ ރިޔާސީ ޕްރައިމަރީގެ ކެމްޕޭނުގައި އއ، އދ، ފ، އަދި ދ އަތޮޅަށް ކުރެއްވި ދަތުރުފުޅަށްފަހު މިއަދު ބޭއްވި ނޫސްވެރިންގެ ބައްދަލުވުމުގައި އެމަނިކުފާނަށް ޓިކެޓު ލިބިވަޑައިގެންފިނަމަ އިޚުތިޔާރުކުރައްވާނެ ރަނިންމޭޓަކާ ގުޅޭ ގޮތުން ނޫސްވެރިއެއް ކުރެއްވި ސުވާލަށް ޖަވާބު ދެއްވަމުންނެވެ.

އެ ސުވާލުގެ ޖަވާބުގައި ނަޝީދު ވިދާޅުވީ ރަނިންމޭޓަކަށް ވެވަޑައިގަންނަވާނީ އައްޑޫ ބޭފުޅެއްކަމަށެވެ. އަދި ރަނިންމޭޓަކަށްވާ ބޭފުޅަކީ އައްޑޫ ބޭފުޅަކަށްވީ ނަމަވެސް ރަނިންގ މޭޓަކަށް ވާނީ މުޅި ރާއްޖެ ތަމްސީލު ކުރެވޭ، ރަމްޒު ކުރެވޭ ބޭފުޅެއް ކަމަށެވެ.

Advertisement

ރައީސް ނަޝީދު ވިދާޅުވީ އެމަނިކުފާނުގެ އުމުރުފުޅުންވެސް ދޮށިވަމުން އަންނަކަމަށާއި އެހެންކަމުން ޒުވާނުންގެ ހިއްސާ ސަރުކާރުގައި ބޮޑުކުރެއްވުމަކީ ބޭނުންފުޅުވާ ކަމެއް ކަމަށެވެ.

"އަޅުގަނޑުގެ އުމުރުން ވެސް މިހާރު ކުޑަކޮށް އެބަ ދޮށީވޭ. އަޅުގަނޑު ދެކެނީ ސިޔާސީ މަސައްކަތުގައި ޒުވާނުންގެ ހިއްސާ މިހާރަށް ވުރެ ބޮޑު ވާން ޖެހޭ ކަމަށް. އެހެންވީމާ އަޅުގަނޑު އުންމީދުކުރަން ކާމިޔާބު ރަނިންމޭޓަކާއެކު ކުރިއަށްދެވޭނެ ކަމުގައި،" ނަޝީދު ވިދާޅުވިއެވެ.

ނަޝީދުގެ ރަނިންގ މޭޓަކަށް ވާނީ އައްޑޫ މީހެއް ކަމަށް ވިދާޅުވިނަމަވެސް އެބޭފުޅެއްގެ ނަން ހާމައެއް ނުކުރައްވައެވެ.

މީގެ ކުރިން 2013 ވަނަ އަހަރުގެ ރިޔާސީ އިންތިހާބުގައި ވާދަކުރެއްވިއިރު ވެސް، ނަޝީދުގެ ރަނިން މޭޓަކަށް ހުންނެވި ކުރީގެ އެޑިއުކޭޝަން މިނިސްޓަރު ޑރ. މުސްތަފާ ލުތުފީއަކީ އައްޑޫ ބޭފުޅެކެވެ. އެ ފަހަރު ވެސް ރަނިން މޭޓް އިއުލާން ކުރެއްވުމުގެ ކުރިން، ރަނިން މޭޓަކަށް ވާނީ އައްޑޫ ބޭފުޅެއް ކަން ހާމަކުރެއްވި އެވެ.