ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން މިނިވަން ކުރުމަށް ގޮވާލާ ބާއްވާ މުޒާހިރާތަކުން މިހާރު އާދަޔާޚިލާފަށް އަންހެންބޭފުޅުން ހައްޔަރުމިކުރަނީ ކޮން ނުލަފާ ރޭވުންތެރިކަމެއްގެ ތެރެއިންތޯ ހޯމް މިނިސްޓަރު ޢިމްރާން އަރިހުން ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ސުވާލު ކުރައްވައިފިއެވެ. 

ނިމިދިޔަ ޑިސެމްބަރު މަހުގެ 25 ގައި ރައީސް ޔާމީންގެ މައްޗަށް ކްރިމިނަލް ކޯޓުން 11 އަހަރު ދުވަހުގެ ޖަލު ހުކުމެއް އިއްވާފައިވާއިރު އިދިކޮޅުން ވަނީ އެ ހުކުމް ބަލައި ނުގަންނަކަމަށް ބުނެފައެވެ. އަދި އެ ހުކުމަކީ "ހަރާން" ހުކުމެއްކަމަށް ބުނެ އިދިކޮޅުން ދަނީ ސިލްސިލާގޮތެއްގައި މުޒާހަރާ ކުރަމުންނެވެ. 

އެގޮތުން ރޭވެސް މާލޭގައި އިދިކޮޅުން ވަނީ ރައީސް ޔާމީން މިނިވަންކުރުމަށް ގޮވާލާ އަޑުއުފުލާފަ އެވެ. 

މުޒާހަރާ ފެށިތާ ކުޑަ ވަގުތުކޮޅެއްގެ ތެރޭގައި ފުލުހުން އެ މުޒާހަރާއަށް ހުރަސްއަޅާފައިވާއިރު މުޒާހަރާ ރޫޅާލުމުގެ ތެރެއިން 12 މީހުން ވަނީ ހައްޔަރުކޮށްފަ އެވެ. 

އެގޮތުން ހައްޔަރުކުރެވުނު މީހުންގެ ތެރެއިން 7 މީހުންނަކީ އަންހެނުން ކަން ފާހަގަކުރައްވައި، އެ މީހުންގެ ފޮޓޯ ހިއްސާ ކުރައްވަމުން ޝިޔާމް ކުރެއްވި ޓުވީޓެއްގައި އޭނާ ވަނީ، މުޒާހަރާ ތެރެއިން އާދަޔާ ޚިލާފަށް އަންހެނުން ހައްޔަރު ކުރަނީ ކޮން ނުބައި ރޭވުން ގަނޑެއްގެ ތެރެއިންތޯ ހޯމް މިނިސްޓަރު އިމްރާން އަރިހުން ސުވާލު ކުރައްވާފައެވެ. 

އިދިކޮޅުން ރޭ ކުރިއަށް ގެންދިޔަ މުޒާހަރާގެ ތެރެއިން ހައްޔަރު ކުރި މީހުންތެރޭގައި ނޫސްވެރިއެއްވެސް ހިމެނޭ އިރު އެ އެންމެންވެސް މިހާރު ވަނީ ބަންދުން ދޫކޮށްލާފައެވެ.