ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ގެ ކެންޕެއިން ޖަލްސާއެއް މިރޭ ބޭއްވުމަށް ހަމަޖެހިއްޖެއެވެ. 

އިދިކޮޅުން ބުނީ، ރައީސް ޔާމީން ގެ ކެންޕެއިން ޖަލްސާއެއް މިރޭ 8:45 ގައި ރެހެންދި ހިނގުމުގައި އޮންނާނެ ކަމަށެވެ. 

ރައީސް ޔާމީންއަށް އިދިކޮޅު ކޯލިޝަންގެ ރިޔާސީ ޓިކެޓް ހަވާލު ކޮށްފައިވާއިރު، އެމަނިކުފާނު މިވަގުތު ހުންނެވީ، ވ. އާރަށު މައްސަލަ އާއި ގުޅިގެން އެމަނިކުފާނުގެ މައްޗަށް ދައުލަތުން ކުރި ދައުވާތައް ސާބިތުވާ ކަމަށް ކަނޑައަޅައި 11 އަހަރު ދުވަހަށް އެމަނިކުފާނު ޖަލަށް ލާން ހުކުމް ކުރުމާއި ގުޅިގެން ޖަލުގައެވެ. 

Advertisement

ރައީސް ޔާމީން 11 އަހަރަށް ޖަލަށް ލާން ހުކުމް ކޮށްފައިވީ ނަމަވެސް އެމަނިކުފާނުގެ ކެމްޕެއިން ގެ ކަންކަން ކުރިއަށް ގެންދަވާނެކަމަށް އިދިކޮޅުން ވަނީ ބުނެފައެވެ. އަދި އެމަނިކުފާނުގެ މައްޗަށް ކްރިމިނަލް ކޯޓުން ކޮށްފައިވަނީ ހަރާމް ހުކުމެއް ކަމަށް ބުނެ އިދިކޮޅުން ސިލްސިލާ ކޮށް ކޮންމެ ރެއަކު މާލޭގެ މަގުމަތީގައި އަންނަނީ މުޒާހަރާ ކުރަމުންނެވެ. 

އަދި ޔާމީން ޖަލަށްލީ މައްސަލަ މަތީ ކޯޓަށް ހުށަހަޅައިގެން ރައީސް ޔާމީން މިނިވަން ވެވަޑައިގަންނަވާނެކަމަަށްވެސް އިދިކޮޅުން ބުނެއެވެ. 

މީގެ އިތުރުން، ޖަލުން މިނިވަންވެ ވަޑައިގަތުމާއިއެކު، ކެންޕެއިން ގެ ކަންތަކުގައި ޢަމަލީގޮތުން ރައީސް ޔާމީން ބައިވެރިވެ ވަޑައިގަންނަވާނެ ކަމަށްވެސް ބުނެފައިވެއެވެ.