ޓެކްސީތައް ސަރުކާރަށް ގަނެ ޑްރައިވަރުންނަށް އެހެން ހުނަރެއް ހޯދައިދިނުން ނުވަތަ އެޑްރައިވަރުންނަށް އެމްޓީސީސީން ވަޒީފާ ދޭން ފެންނަ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ، މިއަދު ނޫސްވެރިންނާ ބައްދަލުކޮށް ދެއްކެވި ވާހަކަފުޅުގައެވެ. ނަޝީދުގެ ވާހަކަފުޅުގައި ވިދާޅުވީ، ޓެކްސީ ޑްރައިވަރުންނާ ބައްދަލު ކޮށް، މާލޭގެ މަގުތަކާ ގުޅޭގޮތުން މަޝްވަރާ ކުރެއްވި ކަމަށެވެ.
އާންމު ދަތުރުތަކަށް އެންމެ ރަނގަޅީ ޕަބްލިކް ޓްރާންސްޕޯޓް ކަމަށާއި ބަހުގެ ނިޒާމް އޮންނަން ޖެހޭ ކަމަށް ޓެކްސީ ޑްރައިވަރުންނަށް ދެންނެވި ކަމަށް ނަޝީދު ވިދާޅުވިއެވެ.
އެހެން ނަމަވެސް ޓެކްސީ ކުރެވޭނެ ގޮތްތައް ހަމަޖައްސައިދޭން ޖެހޭ ކަމަށް ނަޝީދު ވިދާޅުވިއެވެ.
"އަޅުގަނޑު ތަފާތެއްގެ ގޮތުގައި ހުށަހަޅާ ސިޔާސަތަކީ ޓެކްސީ ސަރުކާރަށް ގަނެ އަދި ޓެކްސީ ޑްރައިވަރުންނަށް އެހެން ހުނަރެއް ހޯދައިދީ ނުވަތަ އެޑްރައިވަރަށް ބަސްދުއްވާ ކުންފުނިން ވަޒީފާއެއް ދިނުން"ނަޝީދު ވިދާޅުވިއެވެ.
ޓެކްސީ ޑްރައިވަރުން ބުނާ ގޮތުގައި، މި ސަރުކާރު ވެރިކަމަށް ގެނައުމުގައި ޓެކްސީ ޑްރައިވަރުން މުހިންމު ރޯލެއް އަދާ ކުރިއިރު، މި ސަރުކާރުން ޓެކްސީ ޑްރައިވަރުންގެ އެ މަސައްކަތް ބަލައެއް ނުގަނެއެވެ.
މާލޭގައި ބަސް ދަތުރުތައް ކުރަން ފެށުމާއެކު ޓެކްސީ ކުރާފަރާތްތަކުގެ އާމްދަނީ ވަރަށް ބޮޑުތަނުން ދަށްވެފައި ވާކަމަށް ޓޭކްސީ ޑްރައިވަރުން ބުނެއެވެ.
Advertisement
This content is created and paid for by advertisers and does not involve Voice Journalists
