ނ އަތޮޅު ކަނޑޫދޫ ދިގު މުއްދަތަކަށް ވިއްކާލުމަށް ސަރުކާރުން ނިންމާފައިވާތީ، އެކަމާއި ދެކޮޅަށް އެ އަތޮޅު ކައުންސިލުން މަދަނީ ކޯޓަށް މައްސަލަ ހުށައަޅައިފި އެވެ.

އެކަމާއި ދެކޮޅަށް ކައުންސިލުން ވަނީ ގަރާރެއްވެސް ނެރެފައެވެ. 

އެ ގަގާރުގައި ބުނެފައިވަނީ ނޫނު ދޮނައެރިކަނޑޫދޫ ފަތުރުވެރިކަމުގެ ބޭނުމަށް ދިގުމުއްދަތަކަށް ކުއްޔަށް ދޫކުރުމަށް ރައީސުލްޖުމްހޫރިއްޔާ ކަނޑައަޅުއްވާފައިވަނީ ލާމަރުކަޒީ ޤާނޫނުގެ 8 ވަނަ މާއްދާއާ ހިލާފަށްކަމަށެެވެ. އަދި ސަރުކާރުން އެކަން ނިންމާފައިވަނީ އެ ކައުންސިލާއި އެއްވެސް މަޝްވަރާއެއްވެސް ކުރުމަކާ ނުލާ ކަމަށެވެ. 

Advertisement

ގުދުރަތީ ވަސީލަތްތަކާއި ބިން ދެމެހެއްޓެނިވިގޮތުގައި ބޭނުންކުރުމަށް ހުރަސްއެޅޭފަދައިން، އާއްމު ހައްގު ގެއްލޭގޮތަށް، "ނޫނު އަތޮޅު ގުދުރަތީ ވަސީލަތްތަކާ ބިން ދަމަހައްޓާ ބޭނުންކުރުމުގެ ޕްލޭން" އާއި ކަނޑައެޅިގެން ޚިލާފަށްކަމަށް ނ. އަތޮޅު ކައުންސިލުން ވަނީ ބުނެފައެވެ. 

އެތައް ޒަމާނަކުންސުރެ، ނޫނު އަތޮޅު ރައްޔިތުން ބަލަހައްޓަމުން މުއްސަނދިކުރަމުން ކާބަފައިންގެ ފަރާތުން ވާރުތަވަމުން އައިސްފައިމިވާ ގުދުރަތީ ދިރޭ މުދަލުގެ މުއްސަންދިކަމުން، އާއްމު ހައްގުން ރައްޔިތުން ނިޒާމީގޮތެއްގައި ސަރުކާރުތަކުން ރާވައިގެން މަހުރޫމުކުރަމުންދާ ދިއުމަކީ އަދުލުވެރިކަމުގެ ބޭރުން ހިނގާމުންދާ ބޮޑު ބޭއިންސާފެއްކަމުން ރައްޔިތުންގެ ބޮޑެތި ކަންބޮޑުވުންތަކާއި ޝަކުވާތައް ހުރިކަމަށް ނ. އަތޮޅު ކައުންސިލުން ވަނީ ބުނެފައެވެ. 

އޭގެއިތުރުން ރައްޔިތުންގެ ރުހުން ހޯދައިގެން މެނުވީ ދިގުމުއްދަތަށް ރަށްރަށާ ފަޅު ދޫނުކުރުމަށާ އެކަން އެގޮތަށް ކުރިޔަ ނުދިނުމަށް ނ އަތޮޅު ކައުންސިލްގެ އިއްތިފާގުން ނިންމާފައިވާކަމަށް ކައުންސިލުން ނެރުނު ގަރާރުގައި ވަނީ ބުނެފައެވެ. 

ނ. އަތޮޅު ކައުންސިލުން ބުނީ އެ އަތޮޅުން ދަނޑުވެރިކަމާ ފަތުރުވެރިކަމުގެ ބޭނުމަށް މިހާތަނަށް ދިގުމުއްދަތަށް ދޫކުރެވިފައިވާ އެންމެހާ ރަށްތަކަށް މިއަތޮޅުގެ ރައްޔިތުންނާއި މިތަނުގައި ދިރިއުޅެމުންދާ ބިދޭސީން އަރާ ފޭބުން މަނާކުރެވި، މަދު ބައެއްގެ ވިޔަފާރިއާއި އުފާވެރިކަމުގެ ބޭނުމަށް ގިނަ ބައެއްގެ މަންފާއިން މަހުރޫމުކުރަމުންދާ މައްސަލަ މިހާރުވެސް ރައްޔިތުން ތަޖުރިބާ ކުރަމުންދާއިރު، އިތުރަށް އެފަދަ ކަމަކަށް ފުރުސަތުދޭންވެސް ބޭނުން ނުވާކަމަށެވެ. 

އެއާއެކު ސަރުކާރުގެ އެ ނިންމުމާއި ދެކޮޅަށް ނ އަތޮޅު ކައުންސިލުން ވަނީ މަދަނީ ކޯޓަށް މައްސަލަ ހުށައަޅާފައެވެ.