ޓެކްސީތައް ސަރުކާރަށް ގަނެ ޑްރައިވަރުންނަށް އެހެން ހުނަރެއް ހޯދައިދިނުން ނުވަތަ އެޑްރައިވަރުންނަށް އެމްޓީސީސީން ވަޒީފާ ދޭން ފެންނަ ކަމަށް އެމްޑީޕީގެ ރިޔާސީ ޕްރައިމެރީގައި ވާދަ ކުރައްވާ ކުރީގެ ރައީސް މުހައްމަދު ނަޝީދު ދެއްކެވި ވާހަކަތަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙް ރައްދު ދެއްވައިފިއެވެ.

ނަޝީދު އިއްޔެ ނޫސްވެރިންނާ ބައްދަލުކޮށް ދެއްކެވި ވާހަކަފުޅުގައި ވިދާޅުވީ، ޓެކްސީ ޑްރައިވަރުންނާ ބައްދަލު ކޮށް، މާލޭގެ މަގުތަކާ ގުޅޭގޮތުން މަޝްވަރާ ކުރެއްވި ކަމަށެވެ.
އަދި އާންމު ދަތުރުތަކަށް އެންމެ ރަނގަޅީ ޕަބްލިކް ޓްރާންސްޕޯޓް ކަމަށާއި ބަހުގެ ނިޒާމް އޮންނަން ޖެހޭ ކަމަށް ޓެކްސީ ޑްރައިވަރުންނަށް ދެންނެވި ކަމަށް އެމަނިކުފާނު ވިދާޅުވިއެވެ.

އެހެން ނަމަވެސް ޓެކްސީ ކުރެވޭނެ ގޮތްތައް ހަމަޖައްސައިދޭން ޖެހޭ ކަމަށްވެސް ވިދާޅުވިއެވެ.

Advertisement

"އަޅުގަނޑު ތަފާތެއްގެ ގޮތުގައި ހުށަހަޅާ ސިޔާސަތަކީ ޓެކްސީ ސަރުކާރަށް ގަނެ އަދި ޓެކްސީ ޑްރައިވަރުންނަށް އެހެން ހުނަރެއް ހޯދައިދީ ނުވަތަ އެޑްރައިވަރަށް ބަސްދުއްވާ ކުންފުނިން ވަޒީފާއެއް ދިނުން" ނަޝީދު ވިދާޅުވިއެވެ.

ރައީސް ނަޝީދުގެ އެ ވާހަކަފުޅަށް ރައްދު ދެއްވަމުން ބ.އޭދަފުށީގައި މިއަދު ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުން ރައީސް ސާލިޙް ވިދާޅުވީ އެމަނިކުފާނުގެ ވާދަވެރި ފަރާތްތަކުން ސަރުކާރުން އަމިއްލަ ވިޔަފާރިވެރިންގެ ވިޔަފާރިތަކަށް ވަނުމަކީ ކުރަން ހެޔޮވާވަރުގެ ކަމެއް ނޫން ކަމަށް ވިދާޅުވާކަމަށެވެ. 

"ވިދާޅުވަނީ މާލޭގެ ޓެކްސީ ޑްރައިވަރުންނާއި ބައްދަލުކޮށް ސަރުކާރަށް ތިމަންނަމެން ޓެކްސީތައް ނަގާނަމޭ. މިއީ ކޮންބައެއްގެ ވިޔަފާރިއެއްގެ ތެރެއަށް ތޯ މި ވަދެވެނީ؟ ވަކިވަކި އިންޑިވިޖުއަލް، ދުއްވާ ޓެކްސީ ތައް ސަރުކާރަށް ނަގާވާހަކަ. ސަރުކާރުންނޭ ދެން އެ ދުއްވާނީ. ޓެކްސީ ޑްރައިވަރުންނަށް ތިމަންނަމެން ވަޒީފާ ހޯދައިދޭނަމޭ." ރައީސް ނަޝީދު ގެ ސިޔާސަތައް ފާޑުވިދާޅުވަމުން ރައީސް ޞާލިހް ވިދާޅުވިއެވެ. 

ރައީސް ވިދާޅުވީ ޓެކްސީ ޑްރައިވަރުންގެ ޓެކްސީތައް ސަރުކާރަށް ގަތުމަކީ އެކަން ކުރަންޖެހޭ ގޮތް ނޫން ކަމަށާ އެއީ އެއްގޮތަކަށް ވެސް ކަމު ނުދާ ސިޔާސަތެއް ކަމަށެވެ.

މިއާއެކު، ރައީސް ވިދާޅުވި ގޮތުގައި ޓެކްސީ ޑްރައިވަރުންގެ ޓެކްސީތައް ސަރުކާރަށް ގަތުމުގެ ބަދަލުގައި ކުރަން ޖެހޭ ކަމަކީ ޓެކްސީ ޑްރައިވަރުންނަށް ނުވަތަ ޓެކްސީ ކުރަން ބޭނުންވާ ފަރާތްތަކަށް އައު ކާރު ހޯދައިދީ ދިގު މުއްދަތުން ހަލާސްކުރާ ގޮތަށް ސަރުކާރުން ކާރު ގަނެ ދިނުން ކަމަށެވެ. 

އަދި ރައީސް ޞާލިހުގެ މި ސަރުކާރުގެ ސިޔާސަތަކީ އަދި ޕްލޭން އަކީ ވެސް އެއީ ކަން ފާހަގަކުރައްވައި އެމަނިކުފާނު ވިދާޅުވީ މިއަހަރުގެ ތެރޭގައި ސަރުކާރުން ޓެކްސީތައް ގެނެސް ޓެކްސީ ކުރަން ބޭނުންވާ ފަރާތްތަކަށް ދިގު މުއްދަތުން ދައްކާ ހަލާސް ކުރާ ގޮތަށް ޓެކްސީ ވިއްކާނެ ކަމަށެވެ.