ކުރިއަށް އޮތް ރިޔާސީ އިންތިޚާބަށް ތައްޔާރުވުމަށް ޕްރޮގްރެސިވް ކޮންގްރެސް ކޯލިޝަނުން އެ ކޯލިޝަންގެ ގައުމީ ޖަލްސާ ޖެނުއަރީ 19 އިން 20 އަށް މާލޭގައި ބާއްވަން ނިންމައިފި އެވެ.
އިދިކޮޅުގެ ގައުމީ ޖަލްސާ އިއުލާނުކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އިބްރާހިމް ޝުޖާއު ވިދާޅުވީ ގައުމީ ޖަލްސާ ވެގެންދާނީ ރިޔާސީ އިންތިޚާބަށް ތައްޔާރުވުމަށް އިދިކޮޅުން ބާއްވާ އެންމެ މުހިންމު ހަރަކާތައް ކަމަށެވެ.
މި ހަރަކާތުގައި ޕާޓީގެ އެކި ގުނަވަންތަކުން ބައިވެރިވާނެކަމަށާއި، އަދި ރިޔާސީ އިންތިޚާބުގައި ޕާޓީއިން އަމަލުކުރާނެ ގޮތުގެ ޕްލޭން މި ކޮންފަރެންސްގެ ތެރެއިން އެކަށައެޅޭނެކަމަށް ޝުޖާއު ވިދާޅުވިއެވެ.
"ޖެނުއަރީ 19-20 އަށް، މި ދެ ދުވަހު ރައީސް އަބްދުﷲ ޔާމީން އަބްދުލްގައްޔޫމުގެ ކެމްޕޭނުގެ އެންމެ މުހިންމު މަސައްކަތްކަމަށްވާ އަޅުގަނޑުމެންގެ ރަސްމީ ކޮންފަރެންސް "އުންމީދާއެކު" މި ކޮންފަރެންސް އަޅުގަނޑުން ފުރަމާލޭގައި ބޭއްވުމަށް ވަނީ ނިންމާފަ"
ޕީއެންސީގެ ނައިބުރައީސް އިބްރާހިމް ޝުޖާއު
މި ކޮންފަރެންސް ބޭއްވުމަށް ހަމަޖެހިފައިވަނީ އާޓިފިޝަލް ބީޗުގައިކަމަށް އިދިކޮޅުން ވަނީ ބުނެފައެވެ. މި ކޮންފަރެންސްގައި ޕާޓީގެ އިންތިޚާބީ ހުރިހާ ގުނަވަންތަކުންވެސް ބައިވެރިވާނެކަމަށް އިދިކޮޅުން ވަނީ ބުނެފައެވެ.
އޭގެ ތެރޭގައި ޕާޓީގެ ލީޑަރޝިޕްއާއި، ގޮއިންޓް ސެނެޓުގެ މެމްބަރުންގެ އިތުުރުން ދާއިރާތަކުގެ ރައީސުންނާއި، ރަށްރަށުގެ ސްޓިއަރިން ކޮމެޓީގެ މެމްބަރުން ހިމެނިވަޑައިގަންނަވާނެކަމަށް އިދިކޮޅުން ވަނީ ބުނެފައެވެ. އޭގެ އިތުރުން އިދިކޮޅުން ބުނީ ރާއްޖޭގެ ހުރިހާ ރަށަކުން މެމްބަރުން މި ކޮންފަރެންސްގައި ބައިވެރިވެވަޑައިގަންނަވާނެ ކަމަށެވެ.
ކޮންފަރެންސްއާއި ގުޅޭގޮތުން އިތުރަށް މައުލޫމާތު ދެއްވަމުން ޝުޖާއު ވިދާޅުވީ، އިދިކޮޅުގެ މި ބޮޑު ހަރަކާތް ނިމޭއިރު، ކުރިއަށް އޮތް ރިޔާސީ އިންތިޚާބުގައި ކޮންމެ ރަށެއްގެ ވޯޓު ފޮށި ބަލަހައްޓާނެ މަންދޫބުންނާއި އޮބްސާވަރުން ކަނޑައެޅިގެންދާނެ ކަމަށެވެ.
އަދި އިންތިޚާބުގެ ކަންކަން ގާތުން ބަލާނެ ގޮތުގެ ޓްރެއިނިންވެސް އެ ފަރާތްތަކަށް ފޯރުކޮށްދޭނެކަމަށް އިދިކޮޅުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
