އިދިކޮޅު ކޯލިޝަނުން ރޭ މާލޭގައި ކުރިއަށް ގެންދިޔަ މުޒާހަރާއެއްގެ ތެރެއިން ހައްޔަރު ކުރި އުމުރުން ދުވަސްވީ މީހާއަށް ވަރަށް އަނިޔާ ކުރި ކަމަށާއި އަސާސީ ކަންކަމުގައިވެސް މިހާރު އަތުން މަސައްކަތެއް ކުރެވޭ ވަރެއް ނޫން ކަމަށް އެ ހާދިސާގައި ހައްޔަރު ކުރި ޖަމީލާ ބުނެފިއެވެ.

އާއްމުވެފައިވާ ރޭގެ މުޒާހަރާގެ ވީޑިއޯއިން ފެންނަ ގޮތުގައި، މުޒާހަރާ ކުރާ ސަރަހައްދުން ބަޔަކު ދުއްވައިގަންނައިރު، އެތަނުގައި އުމުރުން ދުވަސްވީ އަންހެނެއް ވެސް ހުރެއެވެ. އެމީހުންގެ ފަހަތުން ފުލުހުން ދުއްވައިގަނެ، އެންމެ ފުރަތަމަ އަތުޖެހެނީ އެ އަންހެން މީހާއެވެ. އަދި ފުލުހުންގެ ބެލުމުގެ ދަށަށް ގެންދަން އުޅުމުން އެ އަންހެން މީހާ ގަދަދެއްކުމުން، ހަރުކަށިކޮށް އޭނާ ގެންދާތަން ވީޑިއޯއިން ފެނެއެވެ.

ޖަމީލާ މިހާރު ދޫކޮށްލާފައި ވާއިރު، އޭނާ ބުނީ، ފުލުހުން ވަރަށް ތަދުކޮށް، ވަރަށް އަނިޔާ ކުރި ކަމަށެވެ.

"(ހައްޔަރު ކުރިއިރު) ދައްތަ އަތް ލަނބާލި ގަޑީގަ ދައްތަޔަށް ވަރަށް ތަދުވި. ދެން އަސާސީ ކަންކަމުގަވެސް ދައްތަޔަށް މިހާރު އަތުން މަސައްކަތެއް ކުރެވޭ ވަރެއްވެސް ނޫން. ދެން އެހާވަރަށްވެސް އަނިޔާ ކޮށްލައިފި. އެކަމަކު ދައްތަގެ ކުށަކީ ކޮބާތޯ ދައްތަ ސުވާލު ކުރިން (ފުލުހުންނާ). ކުރީމަ ބުނި އެއްޗަކީ ގާނޫނާ ހިލާފަ މުޒާހަާ (ކުރީއޭ). ދައްތަ ބުނިން ދައްތަ ހަމަ ގާނޫނުގެ ތެރެއިންނޭ،" ޖަމީލާ ކިޔައިދިނެވެ.

އުމުރުން ދުވަސްވީ މީހެއް އެފަދަ ހަރުކަށި ގޮތަކަށް ހައްޔަރު ކުރުމުން ގިނަބަޔަކު ވަނީ އެކަމާ ފާޑުކިޔާފައެވެ.

އޭގެ ތެރެއިން އެކަކީ ކުރީގެ ފޮރިން މިނިސްޓަރު އަދި އދ. ގެ ސްޕެޝަލް ރެޕަޓުއާއެއްގެ މަގާމުގައި މިހާރު ހުންނެވި ޑރ. އަހުމަދު ޝަހީދުއެވެ.

އެކަމާ ގުޅިގެން ޑރ. ޝަހީދު ކުރެއްވި ޓުވީޓެއްގައި ވިދާޅުވީ، މުޒާހަރާ ކުރުން ފަދަ، އޭނާއަށް ހައްގު ލިބިފައިވާ ކަމެއް ކުރުމުން ހައްޔަރުކުރުން ބަލައިނުގަނެވޭ ކަމަށެވެ. އަދި އެފަދަ އުމުރުން ދުވަސްވީ މީހެއް ހައްޔަރު ކުރުމުގައި، އާއްމު އެހެން މީހުން ހައްޔަރު ކުރުމުގައި ގެންގުޅޭ ހަރުކަށިކަން ގެންގުޅިފައިވާތީ ޑރ. ޝަހީދު ވަނީ ނުރުހުން ފާޅު ކުރައްވާފައެވެ.

އެކަމާ ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، ފުލުހުންގެ ބެލުމުގެ ދަށަށް އަންހެން މީހާ ގެންދިޔަ ގޮތް ބަލަމުންދާ ކަމަށެވެ.