ރައްޔިތުން މަޖިލީހުގެ ރައީސް އަދި އެމްޑީޕީގެ ރައީސް، މުހައްމަދު ނަޝީދުގެ ވެރިކަމުގައި ގައުމަށް ހަމަޖެހުމެއް ލިބުމުގެ ފުރުސަތު ނެތް ކަމަށް ރައްޔިތުން މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

ރޮޒައިނާ ކުރި ޓްވީޓެއްގައި ވިދާޅުވީ ހަލަބޮލި ކަމަށް ލޯބިކުރާ މީހަކަށް ހަމަޖެހުމެއް ނުގެނެސްދެވޭނެ ކަމަށެވެ. އެހެންކަމުން ނަޝީދުގެ ވެރިކަމެއްގެ ތެރެއިން މިޤައުމަށް ހަމަޖެހުން ލިބުމުގެ ފުރުސަތެއްނެތް ކަމަށް އޭނާ ވިދާޅުވިއެވެ.

މިއާއެކު ރޮޒައިނާ ވިދާޅުވީ ރައީސް ޞާލިހް އަކީ ހަމަޖެހުމަށް ލޯބިކުރައްވާ ބޭފުޅެއް ކަމަށާއި އެހެންކަމުން ވެރިކަން ކުރެވޭނީ އެމަނިކުފާނަށް ކަމަށެވެ.

Advertisement

އެމްޑީޕީގެ ރިޔާސީ ޕަރައިމަރީ މިމަހު 28 ވަނަ ދުވަހު ބޭއްވުމަށް ހަމަޖެހިފައިވާއިރު، ޕްރައިމަރީގައި ރައީސް އިބްރާހިމް މުހައްމަދު ޞާލިހާއި ވާދަކުރައްވާ ރައީސް ނަޝީދަށް އެންމެ ބޮޑަށް ފާޑުވިދާޅުވާ، ރައީސް ޞާލިހުގެ ފެކްޝަންގެ އެއް މެންބަރަކީ ރޮޒައިނާއެވެ. 

އެގޮތުން، މީސްމީޑިއާ އާއި އޭނޫންވެސް މަންސަތަކުގައި ރޮޒައިނާ، ރައީސް ޞާލިހަށް ތައުރީފް ކުރައްވައި ވާހަކަދައްކަވާއިރު، ނަޝީދުގެ ވެރިކަން ކުރެއްވި ގޮތާއި، އެމަނިކުފާނުގެ ގެންގުޅުއްވާ "އެމްޑީޕީ މަގުމައްޗަށް" ނެތުމުގެ ސިޔާސަތަށް އަންނަނީ ފާޑުވިދާޅުވަމުންނެވެ.