ވ. އާރަށުގެ މައްސަލައާއި ގުޅުވާ ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމުގެ މައްޗަށް ކޮށްފައިވަނީ "ހަރާން ހުކުމެއް" ކަމަށް ބުނެ ބަޔާން ނުނެރުމަށް ކައުންސިލްތަކަށް އަންގާ ލޯކަލް ގަވަމަންޓު އޮތޯރިޓީއިން ފޮނުވި ސިޓީއަށް ބޯ ނުލަނބާނެކަމަށް މާލެ އަތޮޅު ކައުންސިލްގެ ރައީސް މުހައްމަދު ނިމާލު ވިދާޅުވެއްޖެ އެވެ.
އެކަމާއި ގުޅޭގޮތުން ލޯކަލް ގަވަމަންޓު އޮތޯރިޓީގެ ބޯޑުގެ ގުރޫޕުގައި ދެކެވުނު ބައެއް ވާހަކަތައް ނިމާލު ވަނީ ސޯޝަލް މީޑިއާގައި ހިއްސާކުރައްވާފަ އެވެ.
ނިމާލް ވިދާޅުވީ ރައީސް ޔާމީންގެ މައްޗަށް ހަރާން ހުކުމެއް ކުރުމުން އެ ވާހަކަ ދައްކާނެކަމަ ށެވެ. ޚިޔާލުފާޅުކުރުމަކީ އޮތް މިނިވަންކަމެއްކަމަށާއި، ވަކި ގޮތަކަށް ކައުންސިލްތަކުން ނެރޭ ބަޔާންތައް ނުނެރުމަށް އެންގުމަކީ އެ ހައްގަށް ހުރަސްއެޅުންކަމަށް ނިމާލު ވިދާޅުވިއެވެ.
"ކައުންސިލްތަކަށް ކައުންސިލް މެމްބަރުން އިންތިޚާބުވެފައި ތިބެނީ، އެ ދާއިރާ ނުވަތަ ރަށެއްގެ ރައްޔިތުންގެ ސިޔާސީ ފިކުރަށް އަގުލަބިއްޔަތު ލިބިގެން. ކައުންސިލް މެމްބަރުންނަށް ބަސް ބުނުމުގެ ފުރުސަތު އޮންނަންވާނެ. ޚުދުމުހުތާރު ސިފައެއް ބިރުގަންނަވައިގެން އޮބާ ބަހައްޓައިގެން ކަންކަން ކުރަން ސިޓީ ފޮނުވުމަކީ"
މާލެ އޮތުޅު ކައުންސިލްގެ ރައީސް ނިމާލު
ނިމާލު ވިދާޅުވީ ވަކި ގޮތަކަށް ބަޔާންތައް ނުނެރުމަށް ކައުންސިލްތަކުގެ މައްޗަށް އަމުރުކޮށް އެލްޖީއޭއިން ފޮނުވި ސިޓީއަށް އިޚްތިރާމު ނުކުރައްވާކަމަށެވެ. އަދި އެ ސިޓީއަށް އިޚްތިރާމު ނުކުރަނީ އެއީ ކައުންސިލްތަކަށްވެސ ލިބިގެންދާ ޚިޔލުފާޅުކުރުމުގެ ހައްގު އެ ސިޓީގެ ސަބަބުން ތަންމިނަށް ހަނިވާތީކަމަށް ނިމާލު ވިދާޅުވިއެވެ.
އަދި އޭނާ ވިދާޅުވީ އެ ސިޓީއަކީ ސިޔާސީ ނުފޫޒާއި ޕްރެޝަރު އިންތިހާއަށް ފޯރުވައިގެން ތައްޔާރުކޮށްފައިވާ ސިޓީއެއްކަންވެސް އެނގިލައްވާކަމަށެވެ. އޭގެ އިތުރުން އެ ސިޓީ ކައުންސިލްތަކަށް ފޮނުވާ އޭގައި އޮތް އެއްޗެއް ތަންފީޒުކުރުމަށް އަމުރުކުރުމަކީ ކުރެވޭނެކަމެއްކަމަށް ގަބޫލު ނުކުރައްވާކަމަށް ނިމާލު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
