އެމީހަކު ލާ ވޯޓަކީ އެމީހެއްގެ ހައްގެއް ކަމަށާއި އެހެން މީހަކު ބުނާގޮތަށް ވޯޓު ދިނުމަކީ އަމިއްލަ ނަފްސަށް ދޯކާދިނުން ކަމަށް އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގު ވިދާާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީ މި މަހު ފަހުކޮޅު އޮންނައިރު އަދި ރިޔާސީ އިންތިޚާބު މި އަހަރު ސެޕްޓެމްބަރު މަހު ބޭއްވުމަށް ހަމަޖެހިފައި ވާއިރު، ރޭ ފުއާދު ކުރެއްވި ޓުވީޓެއްގައި ވިދާޅުވީ، ކޮންމެ އިންތިޚާބެއްގައި ވިޔަސް އެމީހަކު ވޯޓު ދޭންވާނީ އެމީހަކަށް ފެންނަ ކެންޑިޑޭޓަކަށް ކަމަށެވެ.
މި އަހަރު ސެޕްޓެމްބަހުގައި ބާއްވަން ހަމަޖެހިފައިވާ ރިޔާސީ އިންތިޚާބަށް އީސީން ދަނީ ތައްޔާރީތައް ވަމުންނެވެ.
އެގޮތުން އީސީން ވަނީ، އިންތިހާބަށް 120 މިލިއަން ރުފިޔާގެ ބަޖެޓެއް ދިނުމަށް ފިނޭންސްގައި އެދިފައެވެ. ނަމަވެސް އިންތިޚާބަށް ކަނޑައަލާފައި ވަނީ 90 މިލިއަން ރުފިޔާއެވެ.
ނަމަވެސް އިންތިހާބުގެ ފުރަތަމަ ބުރަށް 95 މިލިއަން ރުފިޔާ ހަރަދުވާނެ ކަމަށާއި ދެވަނަ ބުރެއް ބާއްވަން ޖެހިއްޖެނަމަ އެ އަދަދު 120 މިލިއަން ރުފިޔާއަށް އިތުރުވާނެ ކަމަށް އީސީއިން ވަނީ ލަފާކޮށްފައެވެ.
މިވަގުތު އެންމެ ފޯރިއާއެކު ކުރިއަށް ދަނީ އެމްޑީޕީގެ ރިޔާސީ ޕްރައިމަރީއެވެ. އެ ޕްރައިމަރީގައި ރައީސް އިބްރާހިމް މުހައްމަދު ޞާލިހު ވާދަކުރައްވާއިރު ދެން ކުރިމަތިލައްވާފައި ވަނީ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދެވެ.
Advertisement
This content is created and paid for by advertisers and does not involve Voice Journalists
