ޚިޔާލުފާޅުކޮށްގެން އެންމެ ގިނަ މީހުން ހައްޔަރުކުރީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވެރިކަމުގައި ކަމަށް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ. 

ޑރ ޖަމީލު އެފަދައިން ވިދާޅުވެފައިވަނީ ޚިޔާލުފާޅުކުރުމުގެ ހައްގު ތަންމިނަށް ހުޅުވާލެވިއްޖެކަމަށް ރައީސް ސޯލިހު ވިދާޅުވިނަމަވެސް އިދިކޮޅުގެ މުޒާހަރާގެ ތެރެއިން ގިނަ ބަޔަކު ހައްޔަރުކުރަމުންދާ ދިއުމާއި ގުޅިގެން ނުރުހުން ފާޅުކުރައްވާ ކުރެއްވި ޓްވީޓެއްގައެވެ. 

ޑރ ޖަމީލުގެ އެ ޓްވީޓުގައި ވިދާޅުވީ އިސްލާހީ މަސައްކަތްތައް ކުރުމުގެ ފުރުސަތު ލިބިވަޑައިގަތުމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރެއްވި ކަމަކީ އެ މަސައްކަތަކަށް ހުރަސްއެޅުއްވުން ކަމަށެވެ. 

Advertisement

ރައީސް ސޯލިހަކީ އިސްލާހީ މަސައްކަތްތައް ކުރުމަށް އެންމެ ބޮޑު ފުރުސަތެއް ލިބިވަޑައިގެންނެވި ރައީސްކަމަށާއި، އެހެން ނަމަވެސް އެމަނިކުފާނަށް ލިބިވަޑައިގެންނެވި ފުރުސަތުގައި އެއަށްވުރެ ބޮޑަށް އެ މަސައްކަތަށް ހުރަސް އެޅުއްވި ބޭފުޅެއްވެސް ނެތްކަމަށް ޑރ ޖަމީލު ވިދާޅުވި އެވެ. 

އޭގެ އިތުރުން ވިދާޅުވީ 2008 ވަަނަ އަހަރުގެ ގާނޫނު އަސާސީއާއެކު ރައްޔިތުންނަށް ލިއްބައިދިން ޚިޔާލުފާޅުކުރުމުގެ ހައްގަށް އެންމެ ބޮޑަށް ހުރަސްއެޅި ބޭފުޅަކީވެސް ރައީސް ސޯލިހުކަމަށެވެ. އަދި ރައީސް ސޯލިހުގެ ވެރިކަމަކީ ޚިޔާލުފާޅުކޮށްގެން ރައްޔިތުން އެންމެ ގިނައިން ހައްޔަރުކުރި ސަރުކާރުކަމަށް ޑރ ޖަމީލު ވިދާޅުވިއެވެ. 

ޑރ ޖަމީލު މިފަދައިން ވިދާޅުވެފައިވާއިރު، ރައީސް ޔާމީން ޖަލަށްލި ފަހުން އިދިކޮޅުން ކުރަމުންދާ މުޒާހަރާގެ ތެރެއިން މިހާތަނަށް 100އަށްވުރެ ގިނަ މީހުން ހައްޔަރުކޮށްފައިވާކަމަށް އިދިކޮޅުން ވަނީ ބުނެފައެވެ.

އަދި އޭގެ ތެރެއިން 2 މީހެއްގެ ބަންދު މުއްދަތު އިތުރުކޮށްފައިވާއިރު، މުޒާހަރާ ކަވަރުކުރަމުން ދިޔަ ޗެނަލް-13 ގެ ސީއޯއޯ މުހައްމަދު ސަމާހު ވަނީ އިރުއޮއްސި 6:00 އިން ފަތިހު 6:00 އަށް ބޭރަށް ނުދެވޭގޮތަށް 30 ދުވަހަށް ގޭ ބަންދުކޮށްފައެވެ.