ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު މިހާރު ހުންނެވި މަގާމަށް ގެންނަވަން މަޝްވަރާ ކުރިއިރު ނިންމައިގެން ތިބީ 18 މަސް ދުވަހަށް ވެރިކަމަށް ގެނައުމަށް ކަމަށާއި، ދެތިން ދައުރު ދޭން ނުނިންމާ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވީ، ބ. ތުޅާދޫގައި ބޭއްވި އެމަނިކުފާނުގެ ރިޔާސީ ޕްރައިމަރީގެ ކެމްޕެއިން ޖަލްސާގައެވެ.

މިއީ 2018 ނޫންކަން ހަނދާންކޮށްދެމުން ނަޝީދު ވިދާޅުވީ، އޭރު އިއްތިހާދުގެ ލީޑަރުންގެ ތާއިދާއެކު އެމްޑީޕީގެ ފަރާތުން ނިކުންނަ ކެނޑިޑޭޓަށް ރައީސް ޞާލިހު ހަމަޖެއްސެވި ނަަމަވެސް، އޭރު އިއްތިހާދުގެ ވެރިން ތިބީ ޖަލުގައި ކަމަށެވެ.

"އަޅުގަނޑުމެން އެއްވެސް ހާލެއްގައި އެއިރަކު ނިންމައެއް ނޫން ހުރީ ތިން ދައުރަށް، ދެ ދައުރަށް ފަސް ދައުރަށް، ހަގީގަތުގައި ނިންމައިގެން ތިބީ 18 މަސްދުވަހަށް، އަދި އަޅުގަނޑުމެންގެ މެނިފެސްޓޯގައި ލިޔެފައިއޮތީވެސް 18 މަސް ދުވަހަށް، އެހެންވީމައި ރައީސުލްޖުމުހުރިއްޔާ އޭރު ފުރަތަމައިނުންވެސް ވިދާޅުވަމުން ގެންދެވީ އެންމެ ދެކެވަޑައިގަންނަވާ ހިތްވާ ދުވަހަކީ އަލުން އަނބުރާ އަޅުގަނޑު ވެރިކަމަށް އަންނަ ދުވަސްކަމަށް" ނަޝީދު ވިދާޅުވިއެވެ.

މި މަހުގެ 28 ވަނަ ދުވަހުގައި އެމްޑީޕީގެ ރިޔާސި ކެނޑިޑޭޓު ކަނޑައެޅުމަށް ރިޔާސީ ޕްރައިމަރީ ބާއްވަން ހަމަޖެހިފައި ވާއިރު، ޕްރައިމަރީގައި ވާދަ ކުރައްވަނީ ނަޝީދާއި ރައީސް ޞާލިހެވެ.

އެކަމާއި ގުޅިގެން ރައީސް ނަޝީދު ކުރެއްވި ޓުވީޓެއްގައި ވަނީ، އެމަނިކުފާނު ރިޔާސީ ވާދަކުރައްވާނެ ކަމަށް ވިދާޅުވެ، އެމްޑީީޕީގެ އެންމެހައި މެންބަރުންވެސް އެމަނުކުފާނަށް ވޯޓުދެއްވުމަށް އެދިވަޑައިގަންނަވާފައެވެ. 

ދެ ބޭފުޅުންވެސް ކެމްޕޭން ޖަލްސާތައް ފޯރިއާއެކު ކުރިއަށް ގެންދަވާއިރު، ބަހުގެ ހޫނު ހަމަލާތައްވެސް ދަނީ ބަދަލު ކުރައްވަމުންނެވެ.