އިދިކޮޅު ކޯލިޝަނުން މާލޭގައި ކުރި މުޒާހަރާއިން ހައްޔަރުކުރި ޒުވާން އަންހެނެއް 60 ދުވަހަށް ގޭބަންދު ކުރުމަށް ކޯޓުން ނިންމައިފިއެވެ.
އިދިކޮޅުން މުޒާހަރާ ކޮށްފައި ވަނީ އެ ކޯލިޝަންގެ ރިޔާސީ ކެންޑިޑޭޓް، ކުރީގެ ރައީސް ޔާމީނަށް ކޮށްފައިވާ ހުކުމާމެދު ނުރުހުން ފާޅު ކުރުމުގެ ގޮތުންނެވެ.
އެ މުޒާހަރާގައި ހައްޔަރު ކުރި 19 އަހަރުގެ ޒުވާނާއަށް ތުހުމަތުކޮށްފައި ވަނީ ފުލުހުންގެ ދައުރު އަދާ ކުރުމަށް ހުރަސް އެޅި ކަމަށެވެ.
އެހެންކަމުން ކްރިމިނަލް ކޯޓުން ކުރި ޝަރުތުތަކުގެ ތެރޭގައި އިރުއޮއްސި 6 ޖެހުމާއި ފަތިހު 6 ޖެހުމާ ހަމައަށް ބޭރަށް ނުދިއުން ހިމެނެއެވެ.
ނިމިދިޔަ ޑިސެމްވަރު މަހުގެ 25 ގައި ރައީސް ޔާމީންގެ މައްޗަށް ކްރިމިނަލް ކޯޓުން 11 އަހަރު ދުވަހުގެ ޖަލު ހުކުމެއް އިއްވާފައިވާއިރު އިދިކޮޅުން ވަނީ އެ ހުކުމް ބަލައި ނުގަންނަކަމަށް ބުނެފައެވެ. އަދި އެ ހުކުމަކީ "ހަރާން" ހުކުމެއްކަމަށް ބުނެ އިދިކޮޅުން ދަނީ ސިލްސިލާގޮތެއްގައި މުޒާހަރާ ކުރަމުންނެވެ.
އެގޮތުން މިދިޔަ ހޮނިހިރު ދުވަހު މާލޭގައި އިދިކޮޅުން ވަނީ ރައީސް ޔާމީން މިނިވަންކުރުމަށް ގޮވާލާ އަޑުއުފުލާފަ އެވެ.
އިދިކޮޅުން މުޒާހަރާ ފެށިތާ ކުޑަ ވަގުތުކޮޅެއްގެ ތެރޭގައި ފުލުހުން ވަނީ އެ މުޒާހަރާއަށް ހުރަސްއަޅާފަ އެވެ. ސުލްހަވެރި ކަމާއެކު އަޑުއުފުލަމުން ދިޔަ މީހުން ފަހަތައް ޖެއްހުމަށް ފުލުހުން ވަނީ ބާރުގެ ބޭނުންކޮށްފަ އެވެ.
އަދި މުޒާހަރާ ރޫޅާލުމަށް ގިނަ އަދަދެއްގެ ފުލުހުން ވަނީ ހަރަކާތްތެރިވެފަ އެވެ.
Advertisement
This content is created and paid for by advertisers and does not involve Voice Journalists
