ދިވެހި ސަރުކާރުން ރައްޔިތުންނަށް ލިބިދޭ ޚިޔާލު ފާޅުކުރުމުގެ ހައްގަށް ހުރަސްއަޅަމުންދިއުން ބައިނަލްއަގުވާމީ ޖަމުއިއްޔާތަކުން ކުށްވެރިކޮށްފި އެވެ. 

ސުލްހަވެރި އިހްތިޖާޖުތަކަށް ދިވެހި ސަރުކާރުން ހުރަސް ނޭޅުމަށް ގޮވާލާ ބައިނަލްއަޤުވާމީ ޖަމިއްޔާތައް ކަމަށްވާ އެމްނެސްޓީ އިންޓަނޭޝަނަލް އާއި ހިއުމަން ރައިޓްސް ވޮޗް އަދި ޓްރާންސްޕޭރެންސީ މޯލްޑިވްސް އާއި އެސޯސިއޭޝަން ފޯ ޑިމޮކްރަސީ އިން ދަ މޯލްޑިވްސް އިން ވަނީ ބަޔާނެއްވެސް ނެރެފަ އެވެ. 

އެ ޖަމުއިއްޔާތައް ގުޅިގެން ނެރުނު ބަޔާނުގައި ބުނެފައިވަނީ ގާނޫނު އަސާސީގައި ޚިޔާލު ފާޅުކުރުމުގެ މިނިވަންކަން ކޮންމެ މީހަކަށް ވެސް ލިިބިގެންވާ ކަމަށެވެ. އެގޮތުން ސުލްހަވެރިކޮށް ހިންގާ ހަރަކާތްތައް ބާރުގެ ބޭނުންކޮށް ރޫޅާލައި އެފަރާތްތައް ހައްޔަރު ކުރުމަކީ ގާނޫނު އަސާސީ އާއި ޑިމޮކްރަސީއާ އަދި ބައިނަލް އަގުވާމީ މިންގަނޑުތަކާ ވެސް ޚިލާފު ކަމެއް ކަމަށެވެ.

ޚިޔާލުފާޅުކުރުމުގެ ހައްގަށް ހުރަސްއަޅާ ދިވެހި ފުލުހުން މިހާރު ހިންގަމުންދާ ކަންކަމަކީ ދިވެހިރާއްޖޭގެ ގާނޫނު އަސާސީގެ 27 ވަނަ މާއްދާ އާއި 28 ވަނަ މާއްދާ އާއި 30 ވަނަ މާއްދާ އާއި އަދި 32 ވަނަ މާއްދާ އާއި ވެސް ހިލާފު އަދި ޔުނިވާސަލް ޑެކްލަރޭޝަން އޮފް ހިއުމަން ރައިޓްސް އާއި ދިވެހިރާއްޖެ އިން ސޮއި ކޮށްފައިވާ ބައިނަލްއަޤުވާމީ މަދަނީ އަދި ސިޔާސީ ހައްގުތަކުގެ މުއާހަދާ އާއި ވެސް ހިލާފު އަމަލުތަކެއްކަމަށް އެ ބަޔާނުގައި ވަނީ ބުނެފައެވެ. 

އެކަން ފާހަގަކޮށް ޖަމުއިއްޔާތަކުން ނެރެފައިވާ އެ ބަޔާނުގައި ވަނީ ޚިޔާލު ފާޅުކުރުމުގެ ހައްގާއި މުޒާހަރާ ކުރުމަށް އޮތް ހުރަސްތައް ނައްތާލުމަށް ގޮވާލާފަ އެވެ. 

އޭގެ އިތުރުން އެ ޖަމުއިއްޔާތަކުން ވަނީ އޭގެ އިތުރުން ސުލްހަވެރި މުޒާހަރާތަކުގައި ގާނޫނާއި ހިލާފު އަމަލުތައް ހިންގާ ފުލުހުންގެ މައްސަލަ ބަލައި އެމީހުން ޖަވާބުދާރީ ކުރުވުމަށް ހިއުމަން ރައިޓްސް ކޮމިޝަނަށާއި އިންޓަގްރިޓީ ކޮމިޝަނަށް ގޮވާލާފަ އެވެ.