ސަރުކާރު ކުންފުނިތަކުގެ ވަޒީފާތައް ގިނަވަނީ ތަރައްގީގެ މަޝްރޫއުތައް ގިނަވާތީ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

މިއުވާން މިހެން ވިދާޅުވީ، މިއަދު ރައީސް އޮފީހުގެ ފަރާތުން ނޫސްވެރިންނާ ބައްދަލުކޮށް ދެއްކެވި ވާހަކަފުޅުގައެއެވެ.

އެގޮތުން ގޮއިދޫގައި ބޭއްވި ބައްދަލުވުމުގައި، ސަރުކާރުގެ ކުންފުނިތަކުގެ ވަޒީފާދެނީ މުވައްޒަފުން އަޅުދާސްތު ކުރުމަށް ކަމަށް ރައީސް ނަޝީދު ވިދާޅުވެފައި ވާކަން ފާހަގަ ކުރައްވައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިއުވާން ވިދާޅުވީ ވަޒީފާ އިތުރުވަނީ މަސައްކަތްތަކާއި ޕްރޮޖެކްޓްތައް ކުރިއަށް ދާތީ ކަމަށެވެ.

Advertisement

ސަރުކާރުގެ ކުންފުނިތަކުގަ ވަރަށްގިނަ ވަޒީފާތައް އުފެދޭ ކަމަށާއި އަދި ވަރަށް ގިނަ ޕްރޮޖެކްޓްތައް އެބަ ހިނގާ ކަމަށް މިއުވާން ވިދާޅުވިއެވެ. އަދި ރާއްޖޭގެ ހުރިހާ ރަށެއްގެ ތަރައްގީގެ އެކި މަޝްރޫއުތައް ކުރިއަށް ގެންދާކަމަށާއި، ވަޒީފާ އިތުރުވަނީ އެހެންވެގެން ކަމަށް މިއުވާން ވިދާޅުވިއެވެ.

ތަރައްގީގެ މަޝްރޫއުތަކާއި ޕްރޮޖެކްޓުތައް ގިނަވާ ވަރަކަށް ވަޒީފާ އިތުރުވާނެ ކަމަށް މިއުވާން ފާހަގަ ކުރެއްވިއެވެ.

"ދިވެހި ރައްޔިތުންނަށް ވަޒީފާ އެ ލިބިގެން ދަނީ. އެހެންވީމަ މަސައްކަތްތަކެއް ނުހިނގައޭ ވިދާޅުވާ ބޭފުޅުން އަނެއްކާ އަނެއްކޮޅުންވެސް އެ ވިދާޅުވަނީ މަސައްކަތްތައް ހިނގާ ވާހަކަ ކަންނޭނގެ. މަސައްކަތްތައްތަކެއް ނެތި ހަމަގައިމުވެސް އެއްވެސް ތަނެއްގެ އެއްވެސް މީހަކަށް ވަޒީފާއެއް ދީފައެއް ނޯންނާނެ،" މިއުވާން ވިދާޅުވިއެވެ.