ވ. އާރަށު މައްސަލާގައި ކުރީގެ ރައީސް އަދި އިދިކޮޅު އިއްތިހާދުގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ މައްޗަށް ދައުލަތުން ޖުރި ދައުވާތައް ސާބިތުވާ ކަމަށް ކްރިމިނަލް ކޯޓުން ކަނޑައަޅައި އެމަނިކުފާނު 11 އަހަރަށް ޖަލަށް ލާން ހުކުމް ކޮށްފައިވާއިރު އެ މައްސަލައިގެ ޝަރީއަތް ނިމުނު ގޮތުގެ ރިޕޯޓް އަދިވެސް ޔާމީންގެ ވަކީލުންނާއި ހަވާލު ނުކުރަނީ އިންޑިޔާ އިން ހުއްދަ ނުދޭތީ ކަމަށްވެސް ވެދާނެ ކަމަށް އިދިކޮޅު ކޯލިޝަނުން ތުހުމަތު ކޮށްފި އެވެ. 

އެމްއެމްޕީއާރުސީގެ ހިޔާނާތުގެ ތެރެއިން، ވ. އާރަށް ކުއްޔަށް ދިނުމުގެ މުއާމަލާތުގައި ރައީސް ޔާމީންގެ މައްޗަށް ދައުލަތުން ކުރި ރިޝްވަތު ހިފުމާއި މަނީ ލޯންޑާ ކުރުމުގެ ކުށް ސާބިތުވާ ކަމަށް ކަނޑައަޅައި އެމަނިކުފާނު 11 އަހަރަށް ޖަލަށް ލުމަށް ހުކުމް ކުރީ މިދިޔަ ޑިސެމްބަރު މަހުގެ 25 ވަނަ ދުވަހު އެވެ.

އެ ހުކުމް އިސްތިއުނާފު ކުރުމުގެ މަސައްކަތް ރައީސް ޔާމީންގެ ގާނޫނީ ވަކީލުންގެ ޓީމުން އަންނަނީ ކުރަމުން އަންނައިރު، އަދިވެސް ޝަރީއަތް ނިމުނު ގޮތުގެ ފުރިހަމަ ރިޕޯޓު މަހްޟަރު ބަޔާންތަކާއެކު ދޫކޮށްފައެއް ނުވެ އެވެ.

Advertisement

އެހެންކަމުން އެ ރިޕޯޓް ހޯދުމަށް އިދިކޮޅު ކޯލިޝަންގެ ލީޑަރުން މިއަދު ވަނީ ކްރިމިނަލް ކޯޓަށް ގޮސްފައެވެ. 

އެއަށްފަހު ބޭއްވި ނޫސްވެރިންނާއި ބައްދަލު ކުރައްވައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް ވިދާޅުވީ، ރައީސް ޔާމީން ގެ ރިޕޯޓް އަދިވެސް ހަވާލު ނުކުރުމުން އެނގިގެން ދަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ނުފޫޒު ފޯރުވައިގެން ރައީސް ޔާމީނަަށް އަނިޔާ ކުރަމުންދާ ކަން ކަމަށެވެ. 

އެހެންނަމަވެސް، އެ ރިޕޯޓް ދޭން ދެން އިދިކޮޅުގެ ޓީމް ކޯޓަށް ދާނެ ކަމަށްވެސް އަދުރޭ ވިދާޅުވިއެވެ. 

އަދުރޭ އިތުރަށް ވިދާޅުވީ، ރައީސް ޔާމީން ޖަލުން ސަލާމަތް ކުރައްވައި، ވެރިކަމަށް އިންތިހާބު ކުރަން އިދިކޮޅުން މަސައްކަތް ކުރަނީ ރާއްޖެ މިހާރު މި އޮތް ހާލަތުން ސަލާމަތް ކުރެއްވުމަށް ކަމަށެވެ. 

އެގޮތުން، އެމަނިކުފާނުގެ ރިޔާސީ ކެމްޕެއިން ގެ ކަންކަންވެސް ވަރަށް ފޯރީގައި ވަރަށް ވަރުގަދަޔަށް ކުރައްވާނެ ކަމަށާ، ކެންޕެއިން ރަސްމީކޮށް ފެއްޓެވުމަށް ބޮޑު ކޮންފަރެންސް އެއް ބޭއްވުމަށް ހަމަޖެހިފައިވާ ކަމަށްވެސް އަދުރޭ ވިދާޅުވިއެވެ. އަދި އެ ކޮންފަރެންސް އަކީ ރާއްޖޭގައި މިހާތަނަށް ބޭއްވޭ އެފަދަ އެންމެ ބޮޑު ކޮންފަރެންސް ކަން ފާހަގަ ކުރައްވައި އަދުރޭ ވިދާޅުވީ އެ ކޮންފަރެންސް ގެ ތެރެއިން ކެންޕެއިންގެ ކަންކަން ރޭވިގެން ދާނެކަމަށެވެ.