ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހުގެ ޕްރައިމަރީ ކެމްޕޭންގައި ދައުލަތުގެ ވަސީލަތްތައް ބޭނުމެއް ނުކުރާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

މިއުވާން މިހެން ވިދާޅުވީ، މިއަދު ރައީސް އޮފީހުގައި ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ.

އެގޮތުން މި ބައްދަލުކުރެއްވުމުގައި، ރައީސްގެ ކެމްޕޭނަށް ދައުލަތުގެ ފައިސާއިން ހަރަދު ކުރައްވާތޯ ވަރަށް ގިނަ ނޫސްވެރިން ސުވާލު އުފައްދާފައި ވެއެވެ.

Advertisement

އެކަމާ ގުޅިގެން މިއުވާން ވިދާޅުވީ، ރައީސްގެ ކެމްޕޭނަކަށް ސަރުކާރުން އެއްވެސް ހަރަދެއް ނުކުރާނެ ކަމަށެވެ. އަދި އެފަދައިން  އެއްވެސް ބޭފުޅަކަށް ފާހަގަ ކުރެވޭ ކަމަށް ވާނަމަ، އޭސީސީއަށް ހުށަހަޅައިގެން ކުރިއަށް ގެންދަވަންވީ ކަމަށް މިއުވާން ވިދާޅުވިއެވެ.

"ދަތުރުފުޅުތަކަށް ބަޖެޓް ކުރެވިފަ އޮންނާނެ ސަރުކާރުގެ ޖުމްލަކޮށް ހުރިހާ ދިމާލެއްގަވެސް ދަތުރުތަކަށް، ހަމައެކަނި ރައީސުލް ޖުމްހޫރިއްޔާ ކުރައްވާ ދަތުރުފުޅެއް ނޫން، ސަރުކާރުން ޖުމްލަކޮށް ހަރަދުތަކެއް ދާނެ ދަތުރު ކުރުމަށް. އެކަމަށްޓަކައި ބަޖެޓް ކޯޑުގަ ބަޖެޓެއް ކަނޑައެޅިފަ އޮންނަނީ ދަތުރުތައް ކުރަން ޖެހޭތީވެ. އެހެންވީމަ ދަތުރުތައް ކުރިއަށް ދާނެ. ދެން ރައީސުލް ޖުމްހޫރިއްޔާގެ މިހާރު އެ ކުރިއަށްދާ އެމްޑީޕީގެ ޕްރައިމަރީ ކެމްޕޭންގަ ދައުލަތުގެ ވަސީލަތްތަކެއް ބޭނުމެއް ނުކުރާނެ އިނގޭތޯ، ރައީސުލް ޖުމްހޫރިއްޔާގެ ކެމްޕޭން ދަތުރުފުޅުތަކަކީ ކެމްޕޭނުން ހަދަރު ކުރައްވައިގެން ވަޑައިގަންނަވާ ދަތުރުފުޅުތައް،" މިއުވާން ވިދާޅުވިއެވެ.

މިފަހުން ރައީސް ރ. އަތޮޅަށާ ބ. އަތޮޅަށް އަދި އުތުރުގެ އަތޮޅުތަކަށް އެ ކުރެއްވި ދަތުރުތަކަކީ ކެމްޕޭނުން ހަރަދު ކުރައްވައިގެން ކުރެއްވި ދަތުރުފުޅުތަކެއް ކަމަށް މިއުވާން ވިދާޅުވިއެވެ.

މީގެ އިތުރުން މިއުވާން ވިދާޅުވީ، ރައީސުލް ޖުމްހޫރިއްޔާ ދަތުރުފުޅުތައް ކުރައްވާއިރު، ކެމްޕޭންގަ އުޅުއްވިކަމުކަވީ ނަމަވެސް ރައީސުލް ޖުމްހޫރިއްޔާ އެއީ ހަމަ ރައީސުލް ޖުމްހޫރިއްޔާ ކަމަށާއި އެމްޑީޕީގެ ޕްރައިމަރީ ކެނޑިޑޭޓެއް ގޮތުގައި މަސައްކަތް ކުރައްވާއިރުވެސް އެއީ ރައީސުލް ޖުމްހޫރިއްޔާ ކަމަށެވެ. އެހެންކަމުން އެމަނިކުފާނުގެ އަރިހުގައި އެމަނިކުފާނުގެ ސެކިއުރިޓީންވެސް އަދި ރައީސުލް ޖުމްހޫރިއްޔާގެ ސަޕޯޓް ޕެކޭޖް ކުރިއަށް ދާނެ ކަމަށެވެ.

"އެއީ ގާނޫނުންވެސް މަނާކުރާ ކަމެއް ނޫން. އެނޫން އެހެން ގޮތަކަށް އެކަން ކުރެވެންވެސް ނޯންނާނެ، ރައީސުލް ޖުމްހޫރިއްޔާ ކޮންމެ ތަނެއްގަ ހުންނެވިޔަސް މާލޭގަ ހުންނެވިޔަސް ނިދުކުރެއްވިިޔަސް އެމަނިކުފާނުގެ ދައުރުގެ ފަސް އަހަރުތެރޭގަ އެމަނިކުފާނަކީ ރައީސުލް ޖުމްހޫރިއްޔާ. އެހެންވީމަ އެކަން އޮންނާނީ އެގޮތަށް، އެހެން ނަމަވެސް ދައުލަތުގެ އެއްވެސް ވަސީލަތެއް ބޭނުމެއް ނުކުރާނެ،" މިއުވާން ވިދާޅުވިއެވެ.