ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ ނުލަފާކަން ދައްކަވާ ބޭފުޅެއް ނޫން ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.

އެމްޑީޕީ ޕްރައިމަރީގެ ރައީސުލްޖުމްހޫރިއްޔާގެ ކެމްޕޭނަށް ސަރުކާރުގެ މުއައްޒަފުންނާއީ ސަރުކާރު ހިއްސާވާ ކުންފުނިތަކުގެ މުއައްޒަފުން ނެރެމުން ދަނީ ވަޒީފާގެ ބިރު ދައްކައިގެން ކަމަށް، ރައީސް ޞާލިހާއި ދެކޮޅަށް ޕްރައިމަރީގައި ވާދަކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އާއި އެމަނިކުފާނުގެ ކެންޕެއިން ޓީމުން އަންނަނީ ތުހުމަތު ކުރައްވަމުންނެވެ. 

އެހެން ނަމަވެސް، ސަރުކާރުގެ ސިޔާސީ މަގާމު ތަކުގައި ތިބި ބައެއް ފަރާތްތަށްވެސް ރައީސް ނަޝީދުގެ ކެންޕެއިންގައި ހަރަކާތްތެރިވަމުންދާއިރު، ދާދިފަހުން މިނިސްޓަރ އޮފް ސްޓޭޓް ފޮރ އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އަހުމަދު މުޖުތަބާވެސް ވަނީ ނަޝީދުގެ ކެންޕެއިންގައި ބައިވެރިވާން ފަށާފައެވެ. އަދި އެކަމަށް މަރުހަބާ ދަންނަވައި ނަޝީދުވަނީ ޓުވީޓެއް ވެސް ކުރައްވާފައެވެ. 

ނަޝީދުގެ އެ ޓުވީޓަށް ރައްދު ދެއްވައި، ރޮޒައިނާ ކުރެއްވި ޓްވީޓެއްގައި އޭނާ ވަނީ، މުޖުތަބާ އަކީ ގާނޫނު އަސާސީގެ 115 ވަނަ މާއްދައިގެ ދަށުން، ރައީސުލްޖުމްހޫރިއްޔާ އުފައްދަވާފައިވާ ސިޔާސީ މަގާމެއްގައި ހުންނެވި ބޭފުޅެއްކަން ފާހަގަކުރައްވާފައެވެ.

އަދި އޭނާ ނަޝީދުގެ ކެންޕެއިންގައި ބައިވެރިވެވަޑައިގަތުމާއި ގުޅިގެން އޭނާ ވަޒީފާއިން ކަނޑާލާފައިވޭތޯ ސުވާލު ކުރައްވަމުން ރޮޒައިނާ ވަނީ ސަރުކާރުން ވަޒީފާގެ ބިރު ދައްކަނީ ކޮންބަޔަކަށްތޯވެސް ސުވާލުކުރައްވާފައެވެ. 

"ތިއީ ސީދާ ގާނޫނު އަސާސީގެ 115 ވަނަ މާއްދާގެ ދަށުން ރައީސުލްޖުމްހޫރިއްޔާ އަށް އެހީތެރިވެ ދިނުމަށް އައްޔަނު ކޮށްފައި ތިބި ބައެއް. ދެން ކޮން ބަޔަކަށް ބިރު ދައްކާ ވާހަކަ އެއްތޯ މަނިކުފާނު ތަކުރާރުކޮށް ތި ދައްކަވަނީ؟ ރައީސް ޞާލިހު އަކީ ނުލަފާކަން ދައްކަވާ ބޭފުޅެއް ނޫން." ރޮޒައިނާ ވިދާޅުވި އެވެ. 

މީގެ އިތުރުން ވެސް ރޮޒައިނާ ކުރެއްވި ޓުވީޓެއްގައި އޭނާ ވަނީ އެމްޑީޕީން މަޖުބޫރު ކޮށްގެން އެއްވެސް މުއައްޒަފަކު އެއްވެސް ތާކަށް ނުގެންދާނެ ކަމަށާ އަދި އެ ޕާޓީ ޕްރައިމަރީގައިވެސް މަޖުބޫރުކޮށްގެން ޕާޓީ މެމްބަރުން އެއްވެސް ތާކަށް ނުގެންދާނެ ކަމަށް ވިދާޅުވެފައެވެ. 

އަދި ގާނޫނު އަސާސީގެ 115 ވަނަ މާއްދާގެ ދަށުން ރައީސް އައްޔަނުކޮށްފައި ތިބި މީހުންވެސް ކިޔާނެ އެއްޗެއް ކިޔަމުން ދާކަމަށާއި އެމީހުންނަށްވެސް ފިޔަވަޅެއް ސަރުކާރުން އަޅާފައިނުވާނެކަމަށްވެސް އޭނާ ވިދާޅުވި އެވެ.