އައްޑޫ ސިޓީގެ ތާއީދު ބޭނުންވަނީ ހަމައެކަނި އައްޑޫ ތަރައްގީކުރަން ނޫން ކަމަށާއި މުޅި ރާއްޖެ ތަރައްގީކުރުމަށް އައްޑޫ ސިޓީގެ ރައްޔިތުންގެ ތާއީދު ބޭނުންވާ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުެވއްޖެއެވެ.

އެމަނިކުފާނު މިހެން ވިދާޅުވީ، އެމްޑީޕީ ރިޔާސީ ކެމްޕޭންގައި އައްޑޫއަށް ވަޑައިގެން ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ.

އައްޑޫ ހިތަދޫގެ އުސްގަނޑަ ބީޗުގައި ރައީސް ޞާލިހަށް ތާއީދު ކުރައްފާ ފަރާތްތަކާ ބައްދަލު ކުރައްވައި ވާހަކަ ދައްކަވަމުން އެމަނިކުފާނު ވިދާޅުވި ގޮތުގައި އައްޑޫ ރައްޔިތުން މިހާ ދުވަހު ތަކުލީފުތަކާ އެކު އުޅެން ޖެހުނީ ކުރީގެ ސަރުކާރުތަކުން އަޅާނުލާ އޮތުމުން ކަމަށާއި އެކަމަށް ދާއިމީ ހައްލެއް ހޯދައިދިނުމުގެ ބަދަލުގައި ކުރީގެ ސަރުކާރުތަކުން މަސައްކަތް ކުރީ ވަގުތީ ހައްލުތަކެއް ހޯދުމަށް ކަމަށެވެ.

ނަމަވެސް މި ސަރުކާރުގެ ދިޔަ ހަތަރު އަހަރުގެ ތެރޭގައި މީގެ ކުރިން ނާންނަ ވަރުގެ ބޮޑު ތަރައްގީއެއް އައްޑުއަށް ގެނެސްދީފައިވާ ކަމަށް ގަބޫލުކުރައްވާ ކަމަށް ރައީސް ވިދާޅުވިއެވެ.

"މި ވޭތުވެދިޔަ ހަތަރު އަހަރުގެ ތެރޭގައި އައްޑޫ ސިޓީއަށް މި ސަރުކާރުން ކޮށްދިން ވަރުގެ ކަމެއް އަދި ވެފައި ހުރި ޕްލެޖުތައް، ނިންމަން ހުރި ކަންތައްތަކަށް ބަލާއިރު އައްޑޫ ސިޓީއަށް މިއަށް ވުރެ ބޮޑު ތަރައްގީއެއް ގެނުވާ ސަރުކާރެއް އޮތް ކަމަކަށް ހަމަ ގައިމު ވެސް ލިޔެކިއުމުން ފެންނާކަށް ނެތް،" އެ މަނިކުފާނު ވިދާޅުވި އެވެ.

ރައީސް ވިދާޅުވީ، އެ އަތޮޅު ތަރައްގީކުރުމަށް ސަރުކާރުން ކުރަން ފެށި މަސައްކަތް ނިންމުމަށް އައްޑޫ ރައްޔިތުންގެ ތާއީދު ވަރަށް މުހިއްމު ކަމަށެވެ.

ރައީސް އައްޑު އަށް ކުރައްވާ މިދަތުރު ފުޅުގައި ފޭދޫ ސްކޫލުގެ 50 ވަނަ އަހަރީ ދުވަހުގެ ޖަލްސާގައި ބައިވެރިވެވަޑައިގަތުމަށާއި ފުލުހުންގެ 34 ވަނަ ޕޮލިސް އިނިޝިއަލް ޓްރެއިނިން ކޯހުގެ ދަސްވެނިމުގެ ރަސްމިއްޔާތުގައި ބައިވެރިވެވަޑައިގަންނަވާނެއެވެ.

އައްޑޫ ސިޓީގެ މި ރަސްމީ ދަތުރުފުޅަށްފަހު، ހުކުރު ދުވަހު އެމްޑީޕީގެ ރިޔާސީ ޕްރައިމަރީގެ ކެންޕެއިންވެސް އެމަނިކުފާނު އައްޑޫގައި ފައްޓަވާނެއެވެ.

އެމްޑީޕީގެ ރިޔާސީ ޕްރައިމަރީގެ ތާރީޚް ކުޑަތަން ވަމުން އަންނަ ވަރަށް ޕްރައިމަރީ ގައި ވާދަކުރައްވާ ދެ ކެންޑިޑޭޓުންގެ ކެންޕޭން ފޯރިވެސް އަންނަނީ ގަދަވަމުންނެވެ. 

މިމަހު 28 ގައި މި ޕްރައިމަރީ އޮންނައިރު، ރައީސް ޞާލިހާއި، އެމަނިކުފާނާއި ވާދަކުރައްވާ ކުރީގެ ރައީސް މުހައްމަދު ނަޝީދު ވެސް ވިދާޅުވަމުން އަންނަނީ އެ ދެބޭފުޅުންނަށްވެސް ޕްރައިމަރީ ކާމިޔާބު ކުރެވޭނެ ކަމުގެ ޔަގީންކަން އޮތް ކަމަށެވެ. 

އަދި ރައީސް ޞާލިހު ދެވަނަ ދައުރަކަށް ކުރިމަތި ލެއްވީ އެމްޑީޕީ އަށް ވެރިކަން ހޯދައި ދެއްވަން ކަމަށް އެމަނިކުފާނު ވިދާޅުވާއިރު، ރައީސް ނަޝީދު ވިދާޅުވީ ރައީސް ޞާލިހު ރިޔާސީ އިންތިހާބުގައި ވާދަކުރައްވާނަމަ ފުރަތަަމަ ބުރުން އެމްޑީޕީ ބަލިވާނެކަމަށެވެ.