ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އައްޑޫ ސިޓީއަށް ކުރައްވާ ދަތުރުފުޅުގައި ހިތަދޫ އަދި މަރަދޫއަށް ވަޑައިގަތުމުން ރައްޔިތުން މުޒާހަރާކޮށްފި އެވެ.
އައްޑޫ ސިޓީގެ ރައްޔިތުން ވަނީ ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާފަ އެވެ. ޝުއޫރުފާޅުކުރަން ނިކުތް ރައްޔިތުން ތިބީ ރައީސް ޔާމީން މިނިވަންކުރުމަށް ގޮވާލާ ޝުއޫރު ފާޅުކޮށްފައިވާ ބޯޑުތައްވެސް ހިފައިގެންނެވެ.
ރައީސް ސޯލިހު އައްޑޫއަށް ވަޑައިގަތުމާއެކު އިއްޔެވެސް އެ ސިޓީގެ ރައްޔިތުން ވަނީ ނުރުހުން ފާޅުކޮށްފައެވެ.
ރައީސް ޔާމީން މިނިވަންކުރުމަށް ގޮވާލާ އިއްޔެ އައްޑޫގައި ކުރިއަށް ގެންދިޔަ މުޒާހަރާ ރޫޅާލުމަށް ފުލުހުން ވަނީ ހާލަތާއި ނުބައްދަލު ބާރުގެ ބޭނުންކޮށްފަ އެވެ.
މުޒާހަރާ ރޫޅާލުމަށް، މުޒާހަރާ ކުރަމުންދިޔަ އާންމުންގެ ގަޔަށް ޕެޕާ ސްްޕްރޭ ޖެހި މަންޒަރު ފެނިގެންދާ ވީޑިއޯއެއްވެސް ވަނީ އާންމުވެފައެވެ. މުޒާހަރާގެ ބައިވެރިންނަށް ފުލުހުން އަނިޔާކޮށް ފަހަތައް ޖައްސާ މަންޒަރުވެސް އެ ވީޑިއޯއިން ފެނިގެންދެއެވެ.
އެމްޑީޕީ ޕްރައިމަރީގެ ކެމްޕޭނަށް ރައީސް ސޯލިހު މީގެ ކުރިން ނ. އަތޮޅަށް ވަޑައިގެންފައިވާއިރު އެ އަތޮޅު ވެލިދޫގެ ރައްޔިތުންވެސް ވަނީ ރައީސް ސޯލިހާއި ދެކޮޅަށް އަޑުއުފުލާފައެވެ. އަދި ރައީސް ޔާމީންގެ މައްޗަށް ކޮށްފައިވާ ހުކުމަކީ ސިޔާސީ ހުކުމެއްކަން ފާހަގަކޮށް އެމަނިކުފާނު މިނިވަންކުރުމަށް ގޮވާލާ އަޑުއުފުލާފަ އެވެ.
Advertisement
This content is created and paid for by advertisers and does not involve Voice Journalists
