ވ. އާރަށު މައްސަލާގައި ކުރީގެ ރައީސް އަދި އިދިކޮޅު އިއްތިހާދުގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ މައްޗަށް ދައުލަތުން ކުރި ދައުވާތަކުގެ މައްސަލައިގެ ޝަރީއަތް ނިމުނު ގޮތުގެ ރިޕޯޓް ލިބިފައިވާ ކަމަށް އެމަނިކުފާނުގެ ވަކީލުންގެ ޓީމުން ބުނެފިއެވެ. 

ވ. އާރަށުގެ މުއާމަލާތާއި ގުޅުވާ ރައީސް ޔާމީންގެ މައްޗަށް އުފުލާފައިވާ ދެ ދައުވާ އެމަނިކުފާނުގެ މައްޗަށް ސާބިތުވާކަމަށް ކަނޑައަޅާ 11 އަހަރުގެ ޖަލުހުކުމެއް ކްރިމިނަލް ކޯޓުން އިއްވާފައިވަނީ ނިމިދިޔަ ޑިސެމްބަރުމަހެ 25 ގައެވެ. 

އެހެން ނަމަވެސް އެ ހުކުމް ގަބޫލު ނުކުރާކަމަށާއި، އެ ހުކުމް އެމަނިކުފާނުގެ ފަރާތްޕުޅުން އިސްތިއުނާފު ކުރައްވާނެކަމަށް ރައީސް ޔާމީންގެ ގާނޫނީ ވަކީލުން ވަނީ ހަމަ އެދުވަހު ވިދާޅުވެފައެވެ. 

ދަށު ކޯޓުން އިއްވާ ހުކުމް 60 ދުވަހުގެ ތެރޭގައި ހައި ކޯޓުގައި އިސްތިއުނާފުކުރަން ޖެހޭނެއެވެ. ރައީސް ޔާމީންގެ މައްސަލަ ވީ އެންމެ އަވަހަކާ އިސްތިއުނާފުކުރަން ބޭނުންވާކަމަށް ގާނޫނީ ޓީމުން ވިދާޅުވި ނަމަވެސް، މައްސަލަ އިސްތިއުނާފުކުރަން ބޭނުންވާ މުހިންމު ލިޔުންތައް ނުލިބޭތީ، އެ މައްސަލައިގެ އިސްތިއުނާފަށް ހުރަސްއެޅިފައިވާ ކަމަަށް ވަކީލުން ވަނީ ވިދާޅުވެފަ އެވެ. 

އެކަމާއި ގުޅިގެން ކަންބޮޑުވުން ފާޅުކޮށް އިދިކޮޅުން ވަނީ ފާއިތުވި ހަފްތާގެ ބުރާސްފަތި ދުވަހު ކްރިމިނަލް ކޯޓަށްވެސް ގޮއްސައެވެ. އަދި ރިޕޯޓް ލިބެންދެން ކޯޓަށް ދާނެ ކަމަށް އިދިކޮޅުން ބުނެފައިވާއިރު، އެ ރިޕޯޓް މިއަދު ލިބިފައިވާ ކަމަށް ވަކީލުންގެ ޓީމުން ވަނީ ބުނެފަ އެވެ. އެހެންކަމުން އެ މައްސަލަ ވަރަށް އަވަހަށް އިސްތިއުނާފް ކުރާނެ ކަމަށް ބެލެވެއެވެ.