ރިޔާސީ އިންތިހާބު ބޭއްވުމަށް މަސައްކަތް ކުރާނެ މަރުކަޒެއް އަދިވެސް ނުލިބޭ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

އިލެކްޝަންސް ކޮމިޝަނުން މިއަދު ބޭއްވި ނޫސްވެރިންގެ ބައްދަލުމުގައި އެ ކޮމިޝަނުގެ ނައިބު ރައީސް އިސްމާއީލް ހަބީބް އަބްދުއްރަހީމް ވިދާޅުވީ، އިންތިހާބަށް މިހާރު އެންމެ މުހިންމު ކަމަކީ، އިންތިހާބުގެ މަސައްކަތް ކުރާނެ މަރުކަޒެއް ކަމަށެވެ. އަދި އެފަދަ ތަނެއް ހަމަ ނުޖެހޭ ކަމަށެވެ.

"ކޮމިޝަނުގެ މިހާރު ދެން އެންމެ މުހިންމު ކަމަކަށް އަޅުގަނޑުމެން މި ބަލަނީ ރިޔާސީ އިންތިހާބުގަ މަސައްކަތް ފެއްޓުމަށްޓަކައި އަޅުގަނޑުމެން މަސައްކަތް ކުރާނެ މަރުކަޒެއްގެ ކަންކަން. ދެން ސަރުކާރުން މިހާރު މީގެ ކުރިން އަޅުގަނޑުމެންނަށް ހަމަޖައްސަވާފަ އޮތީ ބާ ޖަމާލުއްދީން ސްކޫލުގަ އަޅުގަނޑުމެން މަސައްކަތް ކުރާ ގޮތަށް. އެހެން ނަމަވެސް އިނގިވަޑައިގަންނަވާނެ، މިހާރު ބާ ޖަމާލުއްދީން ސްކޫލު ތަޅާލާފަ އެތަނުން އަޅުގަނޑުމެން ނުކުންނަން ޖެހިގެން އަޅުގަނޑުމެންގެ ހެޑް އޮފީހުގަ އަޅުގަނޑުމެންގެ މުވައްޒަފުން މިވަގުތު މަސައްކަތް ކުރަނީ އިންތިހާބުގެ މަސައްކަތް ކުރިން ކުރި މުވައްޒަފުން،" ހަބީބް ވިދާޅުވިއެވެ.

މީގެ އިތުރުން ހަބީބް ވިދާޅުވީ، މިފަހަރު އިންތިހާބުގެ މަސައްކަތް ކުރާނެ މަރުކަޒަކަށް، ދިވެހިރާއްޖޭގެ އަޑުގެ ކުރީގެ އިމާރާތް ހަމަޖައްސަވާދެއްވާނެ ކަމަށް ސަރުކާރުން އަންގާފައިވީ ނަމަވެސް އަދިވެސް އެއްވެސް ތަނެއް ހަމަނުޖެހޭ ކަމަށެވެ.

"އެހެން ނަމަވެސް ވަރަށް ދަތިކޮށް އެ މަސައްކަތް ކުރާތީ ސަރުކާރުގަ ދަންނަވައިގެން ދިވެހިރާއްޖޭގެ އަޑުގެ ބާ އިމާރާތް އަނެއްކާވެސް ހަމަ ބާ ޖަމާލުއްދީން ފަދައިން، ބާ އިމާރާތް އަޅުގަނޑުމެންނަށް ދެއްވާގޮތަށް ހަމަޖައްސަވާފަ އޮތީ. އެހެންވީމަ އެ އިމާރާތް ލިބޭނެ ކަމަށް ޕީއެމްއެމުން އަޅުގަނޑުމެންނަށް އަންގަވާފަ އޮތް ތާރީހަކީ މިއަދު. އެހެން ނަމަވެސް އަދި އޭގެ މާބޮޑު ކުރިއެރުމެއް އޮތް ކަމަކަށް އަޅުގަނޑުމެންނަކަށް ގަބޫލެއް ނުކުރެވޭ،" ހަބީބް ވިދާޅުވިއެވެ.

ރިޔާސީ އިންތިހާބު ބާއްވާނެ ދުވަސް ކަމަށް އީސީން ކަނޑައަޅާފައި ވަނީ އަންނަ ސެޕްޓެމްބަރު ނުވަ ވަނަ ދުވަހެވެ.