އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި ކްރިސްޓަލް ޕެލަސް 1-0 ން ބަލިކޮށް ޗެލްސީ އިން ޕްރެމިއާ ލީގުގެ މިއަހަރުގެ ފުރަތަމަ މޮޅު ހޯދައިފިއެވެ.

މިރޭގެ މެޗުގެ ފުރަތަމަ ހާފުގައި ދެޓީމުގެ ފަރާތުންވެސް ފޯރިގަދަ އެޓޭކިން ކުޅުމެއް ފެނިގެން ގޮސްފައިވާއިރު، މިހާފުގައި ދެޓީމުންވެސް ވަނީ އިދިކޮޅު ޓީމުގެ ގޯލަށް ނުރައްކާތެރި ހަމަލާތަކެއް ފޮނުވާލާފައެވެ. މި ގޮތުން ފުތަރަމަ ހާފުގެ 21 ވަނަ މިނެޓުގައި ކްރިސްޓަލް ޕެލަސްގެ ފުރާންސް މިޑްފީލްޑަރ މައިކަލް އޮލީސް ފޮނުވާލި ނުރައްކާތެރި ހަމަލާ ޗެލްސީގެ ގޯލްކީއްޕަރު ކެޕާ ވަނީ ހުޝިއާރުކަމާއެކު ދިފާއުކޮށްފައެވެ.

ޗެލްސީ އާއި ކްރިސްޓަލް ޕެލަސް ވާދަކުރި މެޗުގެ ތެރެއިން

ފުރަތަމަ ހާފުގެ 25 ވަނަ މިނެޓުގައި ޕެލަސް ޕެނަލްޓީ އޭރިއާ ތެރެއިން މުޅިން ހުސްކޮށްހުރެ ޗެލްސީގެ ބުރެޒިލް ޑިފެންޑަރ ސިލްވާ ބޮލުން ފޮނުވާލި ހަމަލާ ޕެލަސްގެ ކީއްޕަރު ވިސެންޓޭ ގުއައިޓާ ދިފާއުކުރި އިރު، ޗެލްސީގެ ޖަރުމަން މިޑްފީލްޑަރ ކައި ހަވާޓްޒް ފޮނުވާލި ހަމަލާ ދިޔައީ ގޯލާ އަމާޒުނުވެ ހުރަސް ދަނޑިމަތިން ބޭރަށެވެ.

މިރޭގެ މެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ 64 ވަނަ މިނެޓުގައި ޗެލްސީއަށް ކާމިޔާބުކޮށްދިނީ ކައި ހަވާޓްޒް އެވެ. މިއީ އެޓީމުގެ މޮރޮކޯ މިޑްފީލްޑަރ ހަކީމް ޒިޔޭޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާ އެކު މެޗު ނިމިގެންދިޔައީ 1-0 ން ޗެލްސީ މޮޅުވެގެން ނެވެ.

މިރޭގެ މެޗުން ލިބުނު ތިން ޕޮއިންޓާއި އެކު 19 މެޗުން 28 ޕޮއިންޓް ހަމަކޮށް ޗެލްސީ މިވަގުތު އޮތީ ޕްރެމިއާ ލީގު ތާވަލުގެ 10 ވަނައިގައެވެ. މިރޭގެ މެޗުން ބަލިވި ކްރިސްޓަލް ޕެލަސް އަށް 17 މެޗުން ލިބުނު 22 ޕޮއިންޓާއި އެކު އެޓީމު އޮތީ ތާވަލުގެ 12 ވަނައިގައެވެ.