މި ސަރުކާރުން ވެރިކަމާއި ހަވާލުވިފަހުން ގާނޫނު އަސާސީއިން ރައްޔިތުންނަށް ލިއްބައިދީފައިވާ ޚިޔާލު ފާޅުކުރުމުގެ ހައްގަށް ހުރަސް އަޅަމުންދާތީ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު އަދި އިދިކޮޅު އިއްތިހާދުގެ އެކްޝަން ޑިޕާޓުމަންޓުގެ ޗެއަރ މުހައްމަދު އިސްމާއިލް ނުރުހުން ފާޅުކުރައްވައިފި އެވެ.
ރައީސް ޔާމީން މިނިވަންކުރުމަށް ގޮވާލާ އިދިކޮޅުން މާލޭގައި ރޭ ކުރިއަށް ގެންދިޔަ އިހުތިޖާޖުގެ ފެށުމުގެ ކުރިން ބޭއްވި ޖަލްސާއެއްގައި ވާހަކަދައްކަވަމުން މުހައްމަދު އިސްމާއިލް ވިދާޅުވީ، ރައްޔިތުން އަޑު އިއްވަން މަގުމައްޗަށް ނިކުންނަން މަޖުބޫކުރީ ސަރުކާރުން ކަމަށެވެ.
އެގޮތުން ޝަރުއީ ދާއިރާއަށް ނުފޫޒު ފޯރުވާ ވާދަވެރި ސިޔާސީ ލީޑަރު ހުރަގޭގައި ބަންދުކުރީ ހަރާން ހުކުމެއްކޮށްގެންކަން ރައްޔިތުންނަށް އެނގޭ ކަމަށާއި، ރައީސް ޔާމީންގެ ޝަރީއަތަކީ ރައްޔިތުން ބަލަމުންދިޔަ ޝަރީއަތެއްކަމަށް މުހައްމަދު އިސްމާއިލް ވިދާޅުވިއެވެ.
އޭގެ އިތުރުން ސަރުކާރުން ހިންގަމުންދާ ވައްކަމާއި ކޮރަޕްޝަން އިންތިހާއަށް ބޮޑުވެފައިވާއިރު، ސަރުކާރުން ރައްޔިތުންނަށް އެތައް ތަކުލީފެއް އުފުލަން ޖައްސާފައިވާކަމަށް އޭނާ ވިދާޅުވިއެވެ. އޭގެ ތެރޭގައި ސަރުކާރުގެ ޚަރަދުތައް ކުޑަ ނުކޮށް ރައްޔިތުންގެ އަތުން ނަގާ ޓެކްސް ބޮޑުކުރުމަކީ ޖަރީމާއެއްކަން ފާހަގަކުރެއްވި އެވެ.
އެއާއެކު މުހައްމަދު އިސްމާއިލް ވިދާޅުވީ އެކަންކަމާއި ދެކޮޅަށް އަޑުއުފުލުން ހުއްޓުވުމަށް ސަރުކާރުން ގިނަ ހުރަސްތައް އަޅަމުންދާކަމަށެވެ. ޚާއްސަކޮށް އިދިކޮޅުގެ އިހުތިޖާޖުތައް ހުއްޓުވުމަށް ކެނޑިނޭޅި ބާރުގެ ބޭނުން ކުރަމުންދާކަމަށް އޭނާ ވިދާޅުވިއެވެ.
"ސަރުކާރުން އަޅުގަނޑުމެންގެ އަނގަމަތީގައި ޓޭޕު ދަމައިފި.. ޓޭު ދަމާ ގާނޫނު އަސާސާގައި ޚިޔާލު ފާޅުކުރުމުގެ ހައްގު ރައްޔިތުންނަށް ދީފައި އޮތް މާއްދާ 27 ކަފުންކޮށް ވަޅުލައިފި"
ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް
އެވާހަކަތަކާއި ގުޅުވާ މުހައްމަދު އިސްމާއިލް ވިދާޅުވީ މިހާލަތުން އަރައިގަތުމަށް ޒުވާނުން މާޒީއިން ފިލާވަޅު ލިބިގަންނަން ޖެހޭކަމަށެވެ.
ނޮވެމްބަރު 3 ގައި ރާއްޖެ ކުރިމަތިލި އިދިވާނީ ހަމަލާތަކުން ގައުމު ސަލާމަތްކޮށްދިނުމަށް ޝަހީދު ހުސެއިން އާދަމް ނިކުމެވަޑައިގަތީ އެމަނިކުފާނަށް ލިބެން އޮތް ފައިދާއަށް ވިސްނަވާފައި ނޫންކަން މުހައްމަދު އިސްމާއިލް ހަނދާންކޮށްދެއްވިއެވެ.
އޭގެ އިތުރުން އުތީމު ތިންބެއިން ގައުމު ސަލާމަތްކުރުމުގެ ޖިހާދަށް ނިކުމެވަޑައިގަތީ އޭރި ގައުމު އޮތް ހާލަތުގެ ސަބަބުންކަމަށާއި، އެ ބޭކަލުންނަކީ އޭރު ނޫކަށި ފުރާ ޒުވާނުންކަމަށް މުހައްމަދު އިސްމާއިލް ވިދާޅުވިއެވެ.
އޭނާ ވިދާޅުވީ ގައުމުގެ ހާލަތު ބަދަލުކުރުމުގެ އެންމެ އިސް ރޯލެއް އަދާކުރެވޭނީ ޒުވާނުންނަށް ކަމަށެވެ. އަދި އިދިކޮޅުން މިހާރު ކުރަމުންދާ މި މަސައްކަތާއި ވީހާވެސް ގިނަ ޒުވާނުން ގުޅިވަޑައިގަތުމަށް މުހައްމަދު އިސްމާއިލް ވަނީ ގޮވާލައްވާފަ އެވެ.
Advertisement
This content is created and paid for by advertisers and does not involve Voice Journalists
