ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ޖަލުގައި ހުންނެވި މި ދަނޑިވަޅުގައި ޕީޕީއެމް-ޕީއެންސީ ކޯލިޝަން ބައި ބައި ކުރަން އެއްވެސް ފަރާތަކަށް ޖާގަ ނުދެއްވާނެކަމަށް އިދިކޮޅު ކޯލިޝަންގައި ހިމެނޭ ޕީއެންސީގެ ރައީސް އަބްދުއްރަހީމް ވިދާޅުވެއްޖެ އެވެ. 

ޕީީޕީއެމް އޮފީސް ދޮރުމަތީގައި ރޭ ބޭއްވި ޖަލްސާއެއްގައި ވާހަކަދައްކަވަމުން އަބްދުއްރަހީމް ވިދާޅުވީ، މި ވަގުތަކީ ޕާޓީއަށް ވަރަށް ބޮޑު ހިތާމައެއް ލިބިފައިވާ ވަގުތެއްކަމަށެވެ. 

ޕީޕީއެމްގެ ރިޔާސީ ކެންޑިޑޭޓް ރައީސް ޔާމީންގެ މައްޗަށް ނުހައްގުން ޖަލު ހުކުމެއްކޮށް އެމަނިކުފާނު ހުރަގޭގައި ބަންދުކޮށްފައި ވާ މި ދަނޑިވަޅަކީ އެންމެން އެކަތިގަނޑެއް ގޮތަށް މަސައްކަތް ކުރަން ޖެހޭ ވަގުތެއްކަމަށް އަދުރޭ ވިދާޅުވިއެވެ. އަދި އެއާއެކު ވިދާޅުވީ، މި ނާޒުކު ހާލަތުގެ ބޭނުން ހިފާ ޕީޕީއެމްގެ ވާދަވެރިން ޕާޓީގެ ތެރޭގައި މައްސަލަތައް އުފައްދާ ބައި ބައި ކުރުމަށް މަސައްކަތް ކުރަމުންދާކަމަށެވެ. 

Advertisement

އެހެން ނަމަވެސް އެއިން އެއްވެސް ފަރާތަކަށް އެ ފުރުސަތެއް ނެތް ކަމަށާއި، ޕީޕީއެމް-ޕީއެންސީ ކޯލިޝަން އޮތީ ބައި ބައި ކުރުމަށް ޖާގަ ދޭ ވަރަށްވުރެ މާ ބަދަހިކޮށް ކަމަށް އަބްދުއްރަހީމް ވިދާޅުވި އެވެ. 

އަބްދުއްރަހީމް ވިދާޅުވީ ރައީސް ޔާމީން މިނިވަންކުރުމަށް ޕީޕީއެމްގެ އާންމު މެމްބަރުން ކުރައްވަމުން ގެންދަވާ ބުރަ މަސައްކަތަށް ރައީސް ޔާމީންގެ ނަންފުޅުގައި ފަށްފަށުން ޝުކުރު އަދާކުރައްވާކަމަށެވެ.

ޕީޕީއެމް-ޕީއެންސީގެ ލީޑަރޝިޕަށް ލިބޭ އެންމެ ބޮޑު ހިތްވަރަކީވެސް އާންމު މެމްބަރުންގެ ފަރާތުން ލިބޭ ހިތްވަރު ކަމަށާއި، ރައީސް ޔާމީން އަނބުރާ ވެރިކަމަށް ގެނައުމަށް ކުރެވޭ މަސައްކަތުގައި ސާބިތުވެ ތިއްބެވުމަށް އަބްދުއްރަހީމް ވަނީ އެދިލައްވާފައެވެ.