ރާއްޖޭގައި ތިބި އިންޑިއާ ސިފައިން ފޭބުމަށަށް ގޮވައިލައި އިދިކޮޅުން ކުރިއަށް ގެންދިޔަ "އިންޑިއާ އައުޓް" ހަރަކާތް ހުއްޓުވުމަށް ރައީސް އިބްރާހިމް މުހައްމަދު ޞާލިހް ނެރުއްވި ގަރާރު ބާތިލުކުރުމަށް ހައިކޯޓަށް ހުށަހެޅި މައްސަލައިގައި އަޑުއެހުމެއް ތާވަލުކޮށްފިއެވެ.

އެކި އެކި ނަންމުގައި ރާއްޖޭގައި ތިބި އިންޑިއާ ސިފައިން ބޭލުމަށާއި އެގައުމާއި ރާއްޖެއާ ދެމެދު ހަދާފައިވާ އަސްކަރީ އެއްބަސްވުންތައް ހާމަކުރުމަށް ގޮވާލާ އިދިކޮޅު ޕްރޮގްރެސިވް ކޮންގްރެސް ކޯލިޝަނުން ވަނީ 'އިންޑިއާ އައުޓް'ގެ ނަމުގައި ކެމްޕޭނެއް ފަށާފަ އެވެ. 

އެހެންނަމަވެސް އިދިކޮޅު ކޯލިޝަނުން ހިންގާ އިންޑިއާ އައުޓް ޙަރަކާތަކީ ރާއްޖޭގެ ޤާނޫނުތަކާއި އަދި ރާއްޖެއިން ބައިވެރިވެފައިވާ ބައިނަލްއަޤުވާމީ މުއާހަދާތަކާއި ޚިލާފު ޙަރަކާތެއް ކަމަށް ކަނޑައަޅުއްވައި މިދިޔަ އަހަރުގެ އޭޕްރިލް މަހުގެ 21ގައި ރައީސް ޞާލިހު ވަނީ ގަރާރެއް ނެރުއްވާފައެވެ. 

Advertisement

ރައީސް ގެ މި ގަރާރަކީ ހިޔާލު ފާޅުކުރުމުގެ ހައްގާއި، އެއްވެ އުޅުމުގެ އަސާސީ ހައްގު ހަނިވާ ގޮތަށް ގާނޫނުއަސާސީއާ ހިލާފު ގަރާރެއް ކަމުގައި ކަނޑައަޅައި ދިނުމަށް އެދި އަމިއްލަ ފަރާތަކުން ވަނީ މައްސަލަ ހައިކޯޓަށް ހުށަހަޅާފައެވެ. 

މި މައްސަލައިގެ އެންމެ ފަހުން ބާއްވަން ތާވަލް ކުރި އަޑުއެހުން ކެންސަލް ކޮށްފައިވާއިރު އެ ކޯޓުން އެ މައްސަލައިގެ އަޑުއެހުމެއް ތާވަލްކޮށްފައި އޮތީ މި މަހުގެ 24 ވަނަ ދުވަހުގެ މެންދުރު ފަހު 2:00 އަށެވެ.