ކުރީގެ ރައީސް ޔާމީންއަކީ ތަންދޮރު ދަންނަ، ވިޝަނެއް ހުންނެވި ބޭފުޅެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.
މި މަހުގެ 28 ވަނަ ދުވަހު އޮންނަ އެމްޑީޕީގެ ޕްރައިމަރީގެ އަތޮޅު ތެރޭގައި ކެމްޕޭން ހަރަކާތްތައް ބޭއްވުމަށްފަހު މާލެ ވަޑައިގެން ނޫސްވެރިންނާ ބައްދަލުކުރައްވައި ނަޝީދު ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ސަރުކާރުން އިންޑިއާއާއި ދެމެދު ބާއްވަމުންދާ ގާތް ގުޅުމަށް ތާއީދު ކުރައްވާ ކަމަށެވެ. އަދި އެމަނިކުފާނުގެ ވެރިކަމެއްގައިވެސް އެ ގުޅުން ބާއްވަވާނެ ކަމަށެވެ.
މިއާއެކު ނަޝީދު ވިދާޅުވީ އެމަނިކުފާނު، ޔާމީން އާއި ޕީޕީއެމްއާ ދޭތެރޭގައި އޮތް ހަމައެކަނި ހިޔާލު ތަފާތުވުމަކީ "އިންޑިއާ އައުޓް" ކަމަށާ، އެ ކެންޕެއިނަކީ ވަރަށް "ޒެނޮފޯބިކް" ކެންޕެއިނެއް ކަމަށެވެ. އެހެންކަމުން އެ މައްސަލަ އަށް ރައީސް ޔާމީނާއި ޕީޕީއެމް އިން ހައްލެއް ހޯދައި ދޭނެ ކަމުގެ އުންމީދު ކުރައްވާ ކަމަށްވެސް ނަޝީދު ވިދާޅުވި އެވެ.
"ދެން އަޅުގަނޑަކަށް ނޭނގެ ރައީސް ޔާމީން މި ޕްރެސް ކޮންފަރެންސް އަޑު އައްސަވާނެ ކަމެއް. އަޅުގަނޑު ވަރަށް ބޮޑަށް އެދެން ރައީސް ޔާމީން އަރިހުން ފުންކޮށް ވިސްނަވާށޭ."
"ޔާމީންއަކީ އިންޓަލެކްޗުއަލް ބޭފުޅެއް، އެކަޑެމިކް ބޭފުޅެއް، ތަންދޮރު އެނގިވަޑައިގަންނަވާ ވިޝަނެއް ހުރި ބޭފުޅެއް. އަޅުގަނޑު ނުދެކެން އެއީ އެހާ ތަފާތު ބޭފުޅެއްގެ ގޮތުގައި" ނަޝީދު ވިދާޅުވިއެވެ.
އަދި ރައީސް ޞާލިހާއި މެދު އެގޮތަށް ދެންނެވެން ނޯންނާނެ ކަމަށްވެސް ނަޝީދު ވިދާޅުވި އެވެ.
"އަޅުގަނޑަކަށް ނުދެންނެވޭނެ މިހާރުގެ ރައީސް އެގޮތަކަށެއް،" ނަޝީދު
އެހެންކަމުން، ރައީސް ނަޝީދު ތަކުރާރުކޮށް ވަނީ އިންޑިއާ އާއި މެދު ރައީސް ޔާމީނާއި ޕީޕީއެމުން ދެކެމުން އަންނަ ގޮތާއިމެދު ރަނގަޅަށް ވިސްނުމަށް އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
