މިއަދުގެ އަދާލަތު ޕާޓީގެ ބައެއް މެންބަރުން ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ހައްޔަރުކޮށް، ޖަލުގައި ބަންދުކޮަށް، ތުނބުޅީގައި ޗިލީ ސޯސްލައި، ތުނބުޅި ބޭލުވީ، އެމަނިކުފާނާއި ޖެހިގެން ހުރި ގޮޅިތަކުގައި ބައިތިއްބައިގެން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މި މަހުގެ 28 ވަނަ ދުވަހު އޮންނަ އެމްޑީޕީގެ ޕްރައިމަރީގެ އަތޮޅު ތެރޭގައި ކެމްޕޭން ހަރަކާތްތައް ބޭއްވުމަށްފަހު މާލެ ވަޑައިގެން ނޫސްވެރިންނާ ބައްދަލުކުރައްވައި ނަޝީދު ވިދާޅުވީ އަދާލަތު ޕާޓީގައި ވަރަށް ގިނަ ރަނގަޅު ސިފަ ހުރި ކަމަށާ، ޚާއްސަ ގޮތެއްގައި އެޕާޓީން އިސްލާމްދީނަށް ދޭ އަހައްމިއްޔަތުކަމާއި ދީނީ ކަންކަން ރައްޔިތުންނަށް އަންގައި ދިނުމަށް ކުރަމުންދާ ގިނަ މަސައްކަތްތަކަކީ ބަލައި ގަންނަ ކަންކަން ކަމަށެވެ.
"އިސްލާމް ދީނުގެ އަސްލުތައް އަޅުގަނޑުމެންގެ ތެރޭގައި އެބޭފުޅުން ވަކާލާތު ކުރާގޮތް، އަދި އަޅުގަނޑުމެންނަށް އަންގައިދެމުންދާ ގޮތް، އޭގެ ތެރެއިން ގިނަ ޝެއިޚުންނަކީ އަޅުގަނޑު ދެކޭ ގޮތުގައި، ވަރަށް ރަނގަޅު، އަދި ވަރަށް ތަންދޮރު އެނގޭ، ހެޔޮލަފާ ނަސޭހަތް އަޅުގަނޑުމެންނަށް ދޭ ބައެއް."
"އަޅުގަނޑު ޖަލުގައި އޮތިން މިއަދުގެ އަދާލަތު ޕާޓީގެ މެންބަރުން، އޭރު އެބޭފުޅުންގެ ތުނބުޅީގައި ޗިލީ ސޯސް ލާފައި ތުނބުޅި ބާލަނީ، އަޅުގަނޑާއި ޖެހިގެން ހުރި ގޮޅިތަކުގައި އެބޭފުޅުން ބައިތިއްބާފައި ހުރީ." ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ، އެ ބޭފުޅުން ޖަލުގައި ބަންދުކޮށްގެން އެފަދައިން ކަން ކުރާތަން ފެނިވަޑައިގަތުމުން ބުނާނެ އެއްޗެއްވެސް ނޭނގުނު ކަަމަށެވެ. އަދި އެމަނިކުފާނު އެދިވަޑައިގަންނަވަނީ ދީނީ ނަސޭހަތްދޭން ބޭނުންވާ ބޭފުޅުންނަށް އެ ފުރުސަތުދީ އެ މަގު ތަނަވަސް ކޮއްދެއްވުން ކަމަށާ، ޚިޔާލު ފާޅުކުރުމުގެ މިނިވަންކަމުގެ ވާހަކަ އެންމެ ފުޅާ ދާއިރާއެއްގައި ދެއްކެވި އިރުވެސް އެންމެ އިސްކަމެއް ދެއްވީ ދީނީ ނަސޭހަތް ދޭ ފަރާތްތަކަށް އެ ފުރުސަތު ފަހިކޮށްދެއްވުން ކަމަށް ނަޝީދު ވިދާޅުވިއެވެ.
މިއާއެކު ނަޝީދު ވިދާޅުވީ އަދާލަތު ޕާޓީ އަކީ ރާއްޖޭގެ ސީޔާސީ މަޝްރަހަށް ވަރަށް ބޭނުންތެރި ޕާޓީއެއް ކަމަށެވެ.
Advertisement
This content is created and paid for by advertisers and does not involve Voice Journalists
