އެމްޑީޕީގެ ސިޔާސަތުތައް ދޫކޮށް އެމްޑީޕީގެ ޕްރައިމަރީގައި ވާދަކުރައްވާ މަޖިލީހުގެ ރައީސް މުހައްމަދު ނަޝީދު މިހާރު ޕްރޮމޯޓުކުރައްވަނީ މީގެކުރިން ޚުދު އެމަނިކުފާނުވެސް އެންމެ ބޮޑަށް ފާޑުވިދާޅުވި ކުރީގެ ރައީސް ޔާމީން އަބްދުލްގައްޔޫމުގެ ސިޔާސަތުތައް ކަމަށް މި އިންތިޚާބުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ތާއީދުކުރައްވާ މަޖިލީހުގެ މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވެއްޖެ އެވެ.
ސަންގު ޓީވީއަށް ދެއްވި އިންޓާވިއުއެއްގައި ރޮޒޭނާ ވިދާޅުވީ ރައީސް ނަޝީދާއި އެމަނިކުފާނުގެ ކެމްޕޭނު ޓީމުން މަސައްކަތް ކުރައްވަމުން ދަނީ އެމްޑީޕީގެ ސިޔާސަތުތަކާއި ދެކޮޅަށްކަމަށެވެ. އަދި އެމީހުން މަސައްކަތް ކުރަމުންދަނީ ރައީސް ޔާމީންގެ ސިޔާސަތުތައް ޕްރޮމޯޓުކޮށްގެން ތާއީދު ހޯއްދެވުމަށްކަމަށް ރޮޒޭނާ ވިދާޅުވި އެވެ.
އެގޮތުން ރޮޒޭނާ ވިދާޅުވީ އެމްޑީީޕީއަކީ ބޮޑެތި އާބާދީތަކެކޭ އެއްގޮތަށް ކުދި އާބާތީތައްވެސް ތަރައްގީ ކުރަން ޖެހޭކަމަށް ވަކާލާތު ކުރަމުން އަންނަ ޕާޓީއެއްކަމަށެވެ. އަދި ޕާޓީގެ ސިޔާސަތަކީވެސް ކުދި ރަށެއް ބޮޑު ރަށެއް ތަފާތު ކުރުމެއް ނެތި ރަށްތައް ތަރައްގީ ކުރުންކަމަށް ރޮޒޭނާ ވިދާޅުވިއެވެ.
ރޮޒޭނާ ވިދާޅުވީ، ނަޝީދު މިހާރު ވަކާލާތު ކުރައްވަމުންދަނީ މި ސިޔާސަތާއި ޚިލާފަށް ކަމަށެވެ. އެމަނިކުފާނުގެ ވިސްނުންފުޅު ހުރީ ރަށްތައް ތަރައްގީ ކުރުމަށް ރައީސް ޔާމީން ގެންގުޅުއްވި ސިޔާސަތުތަކާއި އެއްގޮތައްކަމަށް ރޮޒޭނާ ވަނީ ވިދާޅުވެފައެވެ.
"އެބޭފުޅުން މި ދައްކާ ވާހަކައަކީ ކުޑަ ރަށްތަކުގެ ކަންތައްތަކެއް ކޮށްދޭނެކަމެއް ނެތޭ ބޮޑު ރަށަށް އެކަންޏޭ ކަންކަން ކޮށްދޭންވީ، އެހެންވީމަ އެއީ އެމްޑީޕީގެ ސިޔާސަތެއް ނޫން އިގޭތޯ. އެއީ ކޮންތާކުން އައި ވިސްނުމެއްކަމެއް އަޅުގަނޑަކަށް ނޭނގެ. އެއީ ރައީސް ޔާމީން ގެންގުޅުއްވި ވިސްނުމެއް އަސްލު"
މަޖިލީހުގެ މީދޫ ދާއިރާގެ މެމްބަރު ރޮޒޭނާ
ރޮޒައިނާ ވިދާޅުވީ މިހާރު އެމްޑީޕީގެ ރައީސްކަމުގައި ހުންނެވި ބޭފުޅަކު ރައީސް ޔާމީންގެ ސިޔާސަތުތައް ނަންގަވައިގެން، އެއީ އެމްޑީޕީގެ ސިޔާސަތެއްކަމަށް ވިދާޅުވީމާ ގަބޫލުކުރަން އުނދަގޫކަމަށެވެ.
އަސްލު އެމްޑީޕީއަކީ ނަޝީދުކަމަށް ވިދާޅުވާއިރު، އެމަނިކުފާނު މަސައްކަތްޕުޅު ކުރައްވަމުން ގެންދަވަނީ ޒަމާނުއްސުރެ އެމްޑީީޕީ ތާއީދުކުރާ، އަދި ހިފަހައްޓަމުން އައި އުސޫލުތަކާއި މުޅިން ޚިލާފަށްކަން ފާހަގަކުރައްވާ ރޮޒޭނާ ވަނީ ބޮޑެތި ފާޑުކިޔުންތަކެއް އަމާޒުކުރައްވާފަ އެވެ.
Advertisement
This content is created and paid for by advertisers and does not involve Voice Journalists
