މަސާޖު ޕާލަރުތަކުގެ ނަމުގައި ފާހިޝް ކަންކަން ކުރުން މުޖުތަމައުގައި އާއްމުވެފައި ވާއިރު އެކަމަށް ފިޔަވަޅު އަޅާނެ މުއައްސަސާއެއް ނެތް ކަމަށް ވިދާޅުވެ ރާއްޖޭގެ ފުންނާބު އުސް ދީނީ ޢިލްމުވެރިޔާ ޑރ. ޢަލީ ޒާހިރު ކަންބޮޑުވުން ފާޅުކުރައްވައިފިއެވެ. 

ދިވެހި މުޖުތަމައުގައި ދީނާއި ޚިލާފް ކަންކަން އާއްމުވަމުންދާތީ އެކަމާއިމެދު ކަންބޮޑުވުން ފާޅުކުރައްވައި ޑރ. ޢަލީ ޒާހިރު ފޭސްބުކް ގައި ކުރެއްވި ޕޯސްޓެއްގައި ވިދާޅުވީ، ‏މީހުން ދިރިއުޅޭ ބައެއް ރަށްރަށުގައި ޓޫރިސްޓުން ނިވައި ކަމެއްނެތި ރަށުތެރޭގައި އުޅުން އާއްމު ކަމަކަށް ވެފައިވާ ކަމަށެވެ.

"ޢާންމުކޮށް އިޝްތިހާރު ކޮށްގެން މަސާޖުޕާލާ ތަކުގެ ނަމުގައި ވިޔާނުދާ އަމަލުތައް ހިންގުންވެސް ޢާއްމު ވެއްޖެ. މިކަންކަމަށް ފިޔަވަޅު އަޅާނެމުއައްސަސާއެއް، ޒިންމާވާނެފަރާތެއް މިއަދު ފެންނާކަށްނެތް. ވަރަށް ދެރަ." ޑރ. ޢަލީ ޒާހިރު ވިދާޅުވި އެވެ. 

Advertisement

ލޯކަލް ޓޫރިޒަމް ފައްކާވެ ރަށްރަށުގައި ގެސްޓް ހައުސްތައް ހުޅުވި، ފަތުރުވެރިން ގިނަވަމުން ދިޔަ ވަރަކަށް، އިސްލާމްދީނާއި ޚިލާފް ކަންކަން ދިވެހި މުޖުތަމައުގައި ދަނީ އާއްމު ވަމުންނެވެ. ވަކިން ޚާއްޞަކޮށް، ރަށުގެ ކުޑަކުދިންނާއި، އުމުރުން ދޮށީ މީހުންނާއި ޒުވާނުން އާއްމުކޮށް އެއްވެ އުޅޭ ތަންތަނުގައި ނިވާކަންކުޑަ ހެދުން އަޅައިގެން ފަތުރުވެރިން އުޅުމާއި، ގާތްގޯޅިކޮށް އުޅުން ފަދަ ކަންކަން ދަނީ އާއްމު ވަމުންނެވެ.

އަދި މީގެ އިތުރުން އެކި ނަންނަމުގައި ހިންގާ މަސާޖު ޕާލަރު ތަކާއި، މީސްމީޑިއާގެ ޕޭޖް ތަކުން ހަށިވިއްކުން ފަދަ ނުބައި ފާހިޝް ކަންކަން ފާޅުގައި ކުރަމުންދާއިރު އެކަންކަން ހުއްޓުވުމަށް މުއައްސަސާތަށް ވަނީ ފެއިލްވެފައެވެ.